كيف يتم ضفط الملفات إلى حجم أقل ؟

- 1:58 م








كيف يتم ضفط الملفات إلى حجم أقل ؟



بسم الله الرحمن الرحيم

أحد أهم الأسئلة اللي اتسألت لنا فى الفترة الأخيرة: إزاي ممكن تضغط الملفات و تخليها أصغر من حجمها
 إذا كان كل حرف حجمه 1 بايت لو لاتيني و 2 بايت لو حاجة تانية؟!

فى الحقيقة الموضوع معقد شوية، لكن هحاول إن شاء الله أخليه أبسط مما تتصور...
لو قلت لك شايف إيه فى شوية الحروف دى: WWWWTTTTT
هتقول لى إيه؟ 

فى الغالب هتقول لى شايف أربع حروف W و خمس حروف  T
طيب لو قلت لك شليف إيه هنا: 4W5T

هتقول لى إيه؟ 
شايف أربعة W و خمسة T برضو طيب تعرف ترجع الحروف الأخيرة للشكل الأول اللي فيه حروف كتير دا؟ 
أسهل حاجة فى الدنيا... أهم يا عم 
WWWWTTTTT

بس يا سيدي... هي دي باختصار شديد جدا طريقة عمل أدوات ضغط البيانات أيا كان نوعها
 تعال بقا

 لو لاحظت فى المثال الأول اللي اديته لك، البيانات (أو الحروف) دى واخدة مساحة كبيرة نسبيا و عاملة
 زحمة (9 أماكن)، و على العكس فى المثال التاني هتلاقى الحروف دى واخدة مكان أقل بكتير (4 أماكن بس)،
 و مع ذلك تقدر بسهولة تترجم البيانات اللى فى المثال التاني (المضغوط) و تكون البيانات الأصلية (اللى مش مضغوطة)


النوع دا من الضغط اسمه Lossless Compression، و دا نوع من الضغط بيحافظ على
 كل تفاصيل و بيانات الملف الأصلي بحيث ممكن ترجعها كاملة فى أي وقت...

أمثلة الـLossless compression كتير، منها على سبيل المثال: الملفات الصوتية اللى بتكون
 بصيغ زي TAA و DST و ALAC، و الى بتعتمد على إنها تديك بيانات أول Bit بس و بعد كدة تديك
الفرق بين البت دا و البت اللى بعده، و دا بيخلى حجم الملف أصغر ما يمكن، و فى نفس الوقت هتاخد تفاصيل
 الصوت كاملة تقريبا حتى الترددات القليلة جدا!

فى الصور مثلا عندك صيغ زي PNG و TIFF و JPEG-LS و حاجات تانية كتير، و اللي بتديك صور
 أقرب ما تكون للصورة الأصلية و بأقل حجم ممكن، خصوصا لو فيها أجزاء كبيرة بنفس درجة اللون...

الطريقة اللى بيشتغل بيها ضغط الصور فى ملف PNGG بسيطة جدا، و هى عبارة عن إنك بتاخد البيكسل
 الأول فى كل عمود فى الصورة من فوق و تحطه زي ما هو، و بناء عليه بتقدر تحدد ألوان البيكسلات اللى
 بعده عن طريق الفرق بين درجات ألوانها و درجات ألوان البيكسل الأصلي؛ و بكدة تكون قللت حجم الصورة
 بشكل كبير و مفقدتش حاجة من تفاصيل الصورة 


نفس النظرية تقريبا بتتطبق فى ملفات الفيديو اللى بتكون مضغوطة بتقنيات Lossless، و اللى بيستخدموا
الطرق دى فى ضغط الـFrame الأول، و بعد كدة تاخد الفرق فى لون البيكسل من Frame للتاني 
--------

اللى فات دا كله كان Lossless Compressionn، و دا بيستخدم غالبا فى أعمال الإنتاج السينيمائي
أو الإنتاج الصوتي؛ و مهما كانت درجة الضغط اللى بتتعمل للملفات بتلاقى إن حجمها مازال كبير برضو 


لكن أوقات كتير بيكون الـLossless compression مش كفاية علشان تضغط ملف للحجم اللى انت عاوزه،
خصوصا لو هتنشر حاجة على النت أو هتبعتها لحد؛ و من هنا ظهرت طرق
 ضغط اسمها Lossy compression...

 فى طريقة الضغط دى انت بتستغنى عن بعض التفاصيل اللى انت شايفها ملهاش لزمة فى البيانات
دى علشان تقلل حجمها بأقصى درجة ممكنة


يعنى لو استخدمنا طريقة الحروف اللى فى الأول دى علشان نمثل الـLossy compression
هقول لك مثلا: 
WWWWTTTTTaTTTT

لو استخدمت نفس طريقة الـLossless compression اللى استخدمناها فى الأول هتضغطها كدة:
 4W5T1a4T

لكن لو استخدمت Lossy compression هيقول لك ما انت ممكن تستغنى عن حرف "a" اللى
 زاحم الدنيا و ملوش لازمة دا و تخليها:

4W9T و اخلص 


الأمثلة اللى على الموضوع دا كتير جدا، من ملفات الموسيقى اللى بصيغة MP3 و WMA،
 للفيديو اللى بصيغة MP4 و MPEG للصور اللى صيغتعا JPEG... كل الحاجات دى بتعتمد على Lossy Compression علشان تقدم لك الملفات بأقل حجم ممكن و بجودة مقاربة للجودة الأصلية (لكن مش زيها)
طرق الـLossy Compression دى بتستخدم فى ملفات الميديا بس؛ و دا لأنك لو استخدمتها
فى أي ملف فيه نصوص أو بيانات تانية مش هتعرف ترجع المحتوى الأصلي تاني...

((عاوز أفكرك إن البوست دا بيشرح الموضوع ببساطة شديدة جدا، و إن تقنيات الضغط دى و غيرها ممكن
تاخد سنين من الشغل المتواصل علشان تتعمل أو يتعدل فيها حاجة؛ لذلك لو كانت خبرتك فى المجال دا
 تتعدى حدود الموضوع فالموضوع دا غالبا مش ليك ))

اذا خلاصة الموضوع

- ضغط البيانات بيكون عن طريق تحويلها لبيانات أصغر ممكن تستخدمها للوصول للبيانات الأصلية

- الضغط دا نوعين:

- نوع اسمه Lossless، و دا بيستخدم فى أي حاجة تقريبا، من الملفات الـZIP و الـRAR
 للصور و الفيديو و الصوتيات، و بيتميز بإنك تقدر ترجع البيانات الأصلية منه بسهولة

- النوع التاني اسمه Lossy Compressionn، و دا بيتميز بإنه بيديك قدرات أكبر على الضغط؛
 و بالتالي أحجام أصغر، و دا استخدامه مقتصر على الفيديو و الصور و الصوت بس؛ لأنه بيعتمد على فقد أجزاء
مش مهمة من البيانات؛ و بالتالي مبتقدرش تسترجع البيانات الأصلية بنسبة 100%


لا تبخل بوضع تعليقك و منشاقشتنا اذا وجدت مشكلة نحن نتمنى رضاء الزائر
الابتساماتالابتسامات

 

ابدأ الكتابة ثم اضغط انتر للبحث