8107339487713063
recent
أخبار ساخنة

تسريبات الموبايلات بتفيد الشركة ولا بتضرها ؟

الخط



بسم الله الرحمن الرحيم

كتير بنشوف "تسريبات" لصور و مواصفات الموبايلات قبل ما بتنزل، لدرجة إن أوقات كتير بنطَنِّش مؤتمر الإعلان
عن الموبايل لأننا عارفين كل اللي هيتقال فيه! 

الفترة اللي فاتت دى كانت مليانه تسريبات لموبايلات من شركات كتير... تسريبات جلاكسى S8... تسريبات iPhone 8... تسريبات Xiaomi mi 6... تسريبات Infinix Hot S2... تسريبات مش عارف إيه..

تفتكر فعلا "التسريبات" دى بتحصل من غير علم الشركات اللي بتعمل الموبايلات ولا بعلمها؟ تفتكرممكن الشركة
هي اللي تسَرَّب صور و مواصفات الموبايل أو معلومات عنه بنفسها؟! و هل الشركات دى بتستفيد
من تسريب معلومات عن موبايلاتها؟! و لو بتستفيد هتستفيد إيه؟ 
كل هذا و أكثر يأتيكم بعد الفاصل....

خلينا نتكلم عن النقطة الأولى: هل التسريبات دى مفيدة ولا مضرة؟ 
الإجابة على السؤال دا بيتوقف على المرحلة اللي بتتسرب فيها المعلومات، و المعلومات اللي بتتسرب نفسها...

بمعنى.. إن الشركات بتصرف ملايين على أي حاجة هتشوفها فى الموبايل... حرفيا أي حاجة، من تصميم الشكل العام للموبايل، للهاردوير المستخدم، للتقنيات الجديدة اللي بيعملوها فى المعالج (لو الشركة هي نفسها اللي بتصنع المعالج)،
 لدراسات الأداء العام للموبايل، لغاية ترتيب القطع بشكل مثالي فى الـFrame بتاع الموبايل...

كل الحاجات دى لو اتسربت فى مراحل التصنيع الأولى (أو قبل التصنيع) ممكن تؤدى لخسائر كبيرة "جدا"
للشركة اللي هتصنع الموبايل بسبب سرقة بعض الأفكار من الحاجات دى، أو إن باقي الشركات تعمل أجهزة
 بهاردوير أقوى و مميزات أفضل؛ و بالتالي تاكل الجو من الموبايل اللي لسة متعملش أساسا! 

لك أن تتخيل إن مراكز التصميم و التطوير فى أي شركة من الشركات الكبيرة اللي بتصنع الموبايلات بتكون سرية
و مُأَمَّنَة زي المناطق العسكرية و يمكن أكتر! كمان التصاميم و النماذج الأولية بتكون أكتر من أسرار عسكرية
ممنوع الاطلاع عليها إلا للأشخاص المسئولين عن تطويرها بس، و مجرد الكلام عنها من قِبَل أي حد
من فريق التطوير ممكن يعرضه للرفد أو لغرامات مالية ضخمة! 

أما إذا حصل التسريب دا بعد اعتماد النماذج النهائية للموبايل و البدء فى التصنيع هتلاقى إن التسريبات دى مفيدة جدا (جدا) للشركات دى، و ممكن الشركات دى هي نفسها اللي تعملها كمان! 
السبب فى كدة هو إن فى الفترة دى الموبايل بيكون بدأ تصنيعه فعليا، و حتى لو أي شركة تانية حبت تقلد التصميم
بتاعه مش هتعرف، حتى لو كان عندها آلة الزمن! 

* يعنى انت عاوز تقنعنى إن التسريبات مفيدة للشركات؟! مفيدة فى إيه بقى إن شاء الله؟

- فى الغالب التسريبات دى بتكون بغرض تشويق الناس للموبايل الجديد، و إنها تخليهم
فى حالة ترَقُّب دائم للتسريبات دى أو أي تسريبات تانية ممكن تنزل بعد كدة 
(علشان كدة بتلاقى أغلب التسريبات عبارة عن صُوَر مُبهمة للموبايل أو الجهاز الجديد دا، و غالبا فى الأول
 بتكون صورة واحدة من زاوية واحدة علشان كل واحد يحاول يستنتج منها حاجة و تبقى حديث الساعة )

- أوقات التسريبات دى بتكون بغرض إنها تبَيِّن سَبق الشركة صاحبة التسريب فى حاجة معينة 
(زي تسريبات الـS8 مثلا اللي بدأت قبل نزول LG G66 بفترة؛ علشان سامسونج تقول إنها بتعمل التصميم
 دا من قبل ما LG تعمله فى الـG6 )

- التسريبات كمان ممكن تكون معمولة علشان "تحجز" اللي عاوز يشترى موبايل و تخليه يستنى الموبايل الجديد لما ينزل خصوصا لو نازل قبله موبايل بخواص ممكن تأثر على مبيعاته 

(زي S8 و G6 برضو... اللي هيشوف الـG6 هيشتريه من غير ما يفكر، لكن لو شاف تسريبات S8 هيفكر
شوية قبل ما يشترى، و غالبا هيستنى لما الـS8 ينزل و يقارنهم ببعض
نفس الكلام بالنسبة لـiPhone 7 Plus و Note 7 الله يرحمه )!

- أوقات كمان التسريب بيكون لميزة معينة الشركة عاوزاها تكون أول انطباع تاخده عن المنتج دا 
(زي تسريب موضوع الـBezels الرفيعة جدا فى الـS8 و S8 pluss، و موضوع الكاميرتين فى iPhone 7 Plus،
 و تسريب الكاميرتين الأماميتين فى Infinix Hot S2)... مش عارف إيه اللي جابنا من سامسونج و آبل لإنفينكس
 بس الاتنين عملوا نفس الحركة عموما 

- ممكن التسريبات تكون بهدف إن الشركة تخلى الناس يشتروا الموبايل بتاعهم و مايستنوش أي موبايل تاني
 من أي شركة تانية 
(زي تسريب المفروض إنه خطير جدا عن شراكة سامسونج و Qualcomm و احتكار سامسونج
 لكل إنتاج كوالكوم من تشيب Snapdragon 835 لغاية النص التاني من 2017، لكن تسريب زي دا الغرض منه
 هو تمويت السوق و وقف حال الشركات الباقية لغاية ما يقدروا ينتجوا موبايلات بالتشيب دي
و بالتالي هيكون الـS8 و S8 Plus هم خيار المشترى الوحيد لو عاوز موبايل بالتشيب دى أثناء المدة
 اللى سامسونج بتحتكر فيها الإنتاج!)

- يا أخى دا حتى بعض التسريبات بتكون الغرض منها هو التمهيد لمصيبة سودة أو حاجة غريبة الشركة ناوية تعملها!  
(عندك مثال.. تسريب إن آيفون 7 و 7 بلس هينزلوا من غير Headphone jackk خلى كل اللي شاف
 التسريبات مايتفاجئش لما سمع الموضوع دا فى مؤتمر الإعلان عن الموبايلين؛ و بالتالي حاجة زي دي
مكانش ليها تأثير كبير على قرار المستخدم إنه يشترى الموبايل أو لأ!... 

مثال تاني هو تسريبات سامسونج لموبايلها Note 7 -الله يرحمه و يفَجَّر البطارية اللي تحت راسه -، لما قالت
 إن النسخة الوحيدة منه هتكون بشاشة منحنية من الجنبين، و اللي مكانش متوقع فى سلسلة النوت
اللي كانت بتنزل دايما بشاشات مسطحة، و مكان البصمة الغبي غباء الأميبا فى S8 و S8 Plus!) 

* طيب.. تفتكر شركات الموبايلات لها دخل فى الموضوع دا؟
انت بتسألنى عن رأيى أنا يعنى؟ 
فى رأيى المتواضع الذى يحتمل الصواب و لا يحتمل الخطأ، إن التسريبات و الصور اللى بتنتشر على النت دى
 كلها بتكون تحت إشراف مباشر من فِرَق التسويق بتاعة الشركات المُصَنِّعَة، و إلا لو كانت غصب عنهم كانوا
 أكيد هيتخذوا إجراءات قانونية ضد اللى بيعمل التسريبات دى (اللى أكيد هم عارفينه)، أو على الأقل يمنعوا وصوله
 للموبايلات قبل ما تنزل! 
 

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

نموذج الاتصال
الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×