-->
U3F1ZWV6ZTEwOTc2NjM5NDkwX0FjdGl2YXRpb24xMjQzNTAxODM2NjQ=
recent
أخبار ساخنة

موضوع شامل و شرح تفصيلى عن اساسيات الكاميرا و مكوناتها

موضوع شامل و شرح تفصيلى عن اساسيات الكاميرا و مكوناتها



اول حاجة علشان تعرف اية الفرق بين الكاميرات غير عدد الميجا بيكسلز ف لازم تبقي فاهم الكاميرا بتتكون من اية..
ف المكونات الرئيسية للكاميرا هما 3 :

1- المستشعر الرقمي (Digital Image Sensor)

2- الغالق (Shutter)

3- العدسات (Lenses)

في ناس ممكن تكون اول مرة تشوف الكلام دا وناس تانية عارفاه 
ف هنتكلم عن كل جزء بالتفصيل المُمل 
-----

1-المستشعر الرقمي (Digital Image Sensor) :


المُستشعر دا يعتبر المكون الاساسي في الكاميرا نظراً ل ان هو بيمثل الكاميرا نفسها 
وهو الجزء المسئول عن إمتصاص الأطياف الخاصة بالضوء والألوان، وبعدها يحولها ل إشارات رقمية تناظرية 
واللي بتروح هي كمان للمعالج المخصص للكاميرا علشان يعالجها ويحولها للصورة اللي حضرتك بتشوفها
عندك ف الاستوديو
  
سهل لحد هنا الكلام، صح ؟! 

نخش ع العك بقى 

بيتكون المستشعر الرقمي من مصفوفة ثنائية الأبعاد من البكسلات، واللي بتمتثل فيها البسكلات طولاً بعُرضاً

ممكن تحدد عدد البيكسلات بحسب عدد الMega Pixels في الكاميرا دي، وبتختلف أحجام البيكسلات دي حسب
 رغبة الشركة وطبيعة الكاميرا والجمهور المستهدف انه يشتريها
عدد الميجابكسلز.. واللي بيتفهم وبشكل غلط أنه العنصر الأساسي والوحيد المُحدد لدقة وجودة الكاميرا 
هو يجي في المرتبة الثالثة في سلم دقة الكاميرات..
بحيث ان المستشعر الرقمي هو المُحدد الأول والرئيسي لدقة وجودة الصور 
والتاني هو حجم البيكسل الواحد لوحده كدا 
وبعدها عدد بيكسلات الكاميرا او نوع المُستشعِر نفسه 

بحيث ان في حالات تخلي الناس اللي واكلينها والعة وبيشترو كاميرات يفضَّلو نوع المُستشعِر علي عدد الميجا بيكسل،
 او العكس بردو علي حسب مزاجهُم.. !! 

*ملحوظة صغيرة* 

-الميجابكسل في الكاميرا مبيحددش جودة الصورة..
بس وظيفتُه هي تقليل التشويش في الصورة عند لما جنابك تخلي ابن اختك الصغير يصورك من بعيد وتقص الصورة بعدها علشان مترجعش تندم انك سيبته يصورك من بعيد ومجاش لزق ف وشك 

-عدد الميجا بيكسلز العالي بيبقي مُفيد للناس اللي بتطبع علي حاجات كبيرة زي اليُفَط اللي بتشوفها وانت ماشي ف الشارع دي 
----------

2-الغالق (Shutter) :

تاني جُزء من الأجزاء الأساسية في الكاميرا هو الغالق، 
الغالق دا هو حاجة كدا بتفِّر قدام المستشعر الرقمي اللي اتكلمنا عليه فوق دا ..
علشان يتحكم في الوقت اللي هيتعرَّض فيه المُستشعِر للضوء 
بمعني انه كل ما الوقت اللي بياخدُه الغالق دا في انه يقفل بيزيد ف دا بالتالي بيزوِّد نسبة الضوء ف تعرف تصور
 في الضلمة وتشوف الصورة منورَّة 
ونفس الموضوع بالعكس كل ما قل الوقت دا بيقلل نسبة الضوء ف تقدر تصوَّر مناطق مُضيئة جداً وتخفف من إضائتها دي علشان اللي يشوف الصورة ميتعميش 
و دى صور بتوضَّح شُغل الغالق دا ولما يشتغل بسرعة او ببُطئ علشان تفهم اكتر 



-طبعاً الجماعة في الموبايلات مش هيعرفو يحطو غالق بسهولة زي الكاميرات علشان حجم كاميرا الموبايل صُغيَّر جداً،
 ف عملو غالق إلكتروني.. 
كدا احنا عندنا نوعين من الغالق، الغالق الإلكتروني والغالق الميكانيكي..
بيميز الأول انه مفيش غالق اصلاً ، بس الغالق هنا هو أنه بيطفي المستشعر الرقمي ويرجعه يشتغل تاني
علي حسب المُدة الزمنية المُحددة للغالِق 
بينما التاني فهو غالق مادي موجود فوق المستشعر نفسه، وطريقة عمله ببساطة أنه بيفتح ويقفل حسب
 المدة الزمنية المتحددة للغالق..

اظن كدا مش محتاج اقولك ان الغالق اللي في مُعظم إن مكانش كل موبايلاتنا هو غالِق إلكتروني 

بعض الفروق بينهم (او مُميزات كل واحد بمعني ادق ) :

الغالق اللإلكتروني : دا بيتميز عن الميكانيكي في انه مبيعملش صوت أثناء التصوير
(مليش دعوة بالصوت اللي طالع من سماعات موبايلك دا علشان بيضحكو بيه ع الزبون )، وبيفتح مجال واسع للكاميرا
في انها تصور عناصر شديدة السُرعة وكأنها مُتوقفة  (و دى صورة توضيحيه )


ودا بسبب عدم وجود غالق فعلي ف ممكن تقلل وقت الغالق دا جداً وممكن تستخدم الغالق في تقليل الضبابية 

الغالق الميكانيكي : دا احسن من الغالق الإلكتروني في انه يقدر يتزامن من الفلاش علشان توصلل أفضل صورة ممكنة باستخدام الفلاش، بالإضافة ل انه بيدِّي للمُستشعِر قُدرته الكاملة في التصوير وتقليل تشوش البيكسلات اثناء التصوير 
----------


3-العدسات (Lenses) :



بمناسبة الكلام عن العدسات..

فتحة العدسة هي المسئولة عن كمية الضوء اللي بتدخل للمستشعر الرقمي.. 
(خُد بالك كمية الضوء مش الوقت اللي بيتعرَّض فيه للضوء زي الغالق )
ف ب استخدام العدسات تقدر تتحكم في مقدار الإضاءة الداخلة للمستشعر الرقمي والتحكُّم في عُمق المَشهد
Depth of Field 
كل ما زاد حجم فتحة العدسة تقدر تشوف تفاصيل اكتر في الضلمة بالمقارنة مع عدسات ب فتحة اصغر
 (منغير ما تلعب في الShutter ولا تيجي جنبه )
وكل ما زاد بردو حجم فتحة العدسة دا بيمكِّنك من انك تركز علي عنصر واحد فب الصورة وباقي الصورة يبقي معمول عليه Blur كدا (ضباب او نَغمَشة كِدا)

*ملحُوظة مُهمة بقي *

فتحة العدسة كل ما قل الرقم اللي بيدل عليها كل ما كانت العدسة اوسع 
يعني مثلا عدسة فتحتها F/1.7 زي اللي في النوت 7 والاس 7 دي اكبر من اللي هي F/2.2 في الP9 مثلا 
(السبب في الحوار دا هو انك بتقسم الF علي الرقم اللي جنبها.. ف كل ما الرقم دا يقل بيزيد ححم الفتحة )
----------

4-مكونات إضافية :


-حساسية المستشعر ISO، معناها قدرة المستشعر على إستقطاب الضوء بشكل أكبر..
دا تستخدمه بس لما تتزنق ومتعرفش تاخُد صورة حلوة 
غير كدا شكليات.. 
مع العِلم انه كل ما زاد بيسبب تشوُّش في الصورة 
يستحسن متزودهوش عن 400 

-التعرض للضوء Light Exposure، والمقصود بيه كمية الإضاءة الموجودة في المشهد..
بحيث تقدر بردو تعدله بالشكل اللي انت عاوزه سواء بزيادة قيمته أو تقليلها علشان توصل ل صورة يا إمَّا أكتر إضائة
 من المشهد الطبيعي او أقل منها 

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×