-->
U3F1ZWV6ZTEwOTc2NjM5NDkwX0FjdGl2YXRpb24xMjQzNTAxODM2NjQ=
recent
أخبار ساخنة

عشر نصائح مهمة علشان موبايلك ميتسرقش

عشر نصائح مهمة علشان موبايلك ميتسرقش





بسم الله الرحمن الرحيم

اليومين دول سرقة الموبايلات انتشرت جدا، فى نفس الوقت اللى سعر موبايل زي
هواوى GR-5 عدى 3500 جنيه فى حين إن سعره كان وصل 1500 من كام شهر 
 لذلك فى الكام يوم اللى فاضلين للواحد فى الدنيا لازم يحافظ على الموبايل اللى معاه لأن اللى بيروح
 اليومين دول بيتكسر وراه قُلَّة و مبيرجعش 

- أول حاجة خلينا متفقين إن أكتر مكان بيتسرق فيه موبايلات هو المواصلات العامة
= بسيطة.. منركبش مواصلات 
- تانى أكتر مكان ممكن موبايلك يتسرق منه هو الشارع
= مننزلش الشارع 
- المطاعم و الأماكن اللى فيها تجمعات كبيرة
= أنا مش لاقى أحلق أصلا، هروح مطاعم؟ 
- عربيتك
= بقولك مش لاقى أحلق، هجيب عربية؟ 
- أي مكان شغل أو مكان عام
= أنا صايع و انطوائي أصلا و بكرهك 

من غير كتر كلام، خلينى أتقمَّس دور أخوك الكبير العاقل اللى اتسرق منه موبايلين قبل كدة
 و بينصحك علشان خايف على مصلحتك 
- حاول متطلعش الموبايل من جيبك كتير لو انت برة (إلا للضرورة طبعا) لأن ممكن لو حرامي شافه ميرجعش عنه،
و تبقى انت اللى جنيت على نفسك 
- خلى بالك من الموبايل و انت بتركب مواصلة أو نازل من مواصلة (خصوصا لو الموبايل فى جيبك)
لأن انا اتسرق منى موبايل بنفس الطريقة 
- لو راكب مواصلة حاول الموبايل يكون فى إيدك و تكون ماسكه كويس.. خصوصا لو مواصلة زحمة أو مكان انتظار عربيات،
و يا سلااام بقى لو واقف فى أتوبيس و متشعذط زي عامة الشعب 
- لو الموبايل فيه مكان لـBand يتربط منها ممكن تركبه لو هتمسكه فى إيدك، أما لو أغلب الوقت حاطه فى جيبك ممكن تكون العلاقة دى سبب لسحب الموبايل من جيبك، و فى كل الأحوال هتكون العلاقة الطويلة ضارة أكتر
 ما بتكون مفيدة؛ لأنها بتوفر للحرامي حاجة يشد منها الموبايل زي السكينة من الحلاوة 
- حاول متطلعش الموبايل و تحطه قدامك فى أماكن عامة زي المطاعم أو مدرجات الجامعة أو على البلاج،
 و ركز أوي فى حتة البلاج دي 
- لو بتنام فى المواصلات حاول تخلى الموبايل فى جيبك و تزنقه برجلك فى أي حاجة جنبك.. حاول تفَطَّسه و تطلع روحه 
- كمان الهاندز فرى ممكن توفر حاجة للحرامي يشد منها الموبايل
 (سواء من غير ما تاخد بالك أو بالقوة و انت ماشي فى الشارع) فحاول تتخلى عن جينات جاستن بيبر
 اللى فى جتتك و شيل السماعة من الموبايل لو هتمسكه فى إيدك أو هتحطه فى جيبك لغاية ما تشوف مُكنَة تقعد فيها 
- الجرابات المطاط (الـRubber) كويسة جدا لأنها بتزود احتكاك الموبايل بالجيب، و بالتالي بتحس بأي حركة
 غريبة للموبايل، و بتصعب على أي حد انه يخرجه من جيبك و انت مش واخد بالك.. ابقى هاتلى معاك واحد 

- حاول متتكلمش فى الموبايل و انت نازل من مواصلة؛ لأن مسكتك ليه بتكون أضعف ما يمكن ساعتها،
 و سهل جدا أي حد يشقطه منك
(بعض الحرامية بيكون أكل عيشهم من إنهم يخطفوا الحاجة على موتوسيكل من اللى نازلين من مواصلات) 
- العيال الصغيرة الرذيلة اللي بتبقى جنبك فى المواصلات ممكن تحدف منك الموبايل فى الشارع 
لو عملها احدفه ورا الموبايل علشان تعرف مكانه 

- طبعا مش محتاج أقول لك تتجنب المشي فى الشوارع الجانبية المقطوعة علشان ماتتثبتش 
- امشى دايما بسياسة مفيش حد صالح كله بتاع مصالح، بمعنى لو حد قالك هات موبايلك اشوف عليه حاجة
 أو اعمل مكالمة أو ابعت رسالة أو...... متديلوش الموبايل كدإلا لو كان واحد صاحبك أو قريبك
أو ما إلى ذلك (واحد صاحبي اتسرق موبايله بالمنطر دا)
- احترس ثم احترس من إنك تسيب موبايل أو لاب أو تابلت أو أي كلام من دة فى العربية بتاعتك، لأن
 ممكن جدا ترجعلها تلاقى الإزاز مكسور علشان الباشا يوصل للي جواها (أنا اعرف واحد إزاز
 عربيته اتكسر علشان فلاشة 8 جيجا و غيره بأكتر من ألف جنيه )
- إوعى تسيب الموبايل على تابلوه العربية و الإزاز مفتوح لأن ممكن أي حد يمد إيده يسحب الموبايل من الشباك..
 حركة مفيش أسهل منها، و خصوصا لو الدنيا زحمة 
- الألذ من كدة ان ممكن واحد يوقفك و يقولك "خد اشحن لى الكارت دة" أو "خد يابني طلعلى رقم فلان"
و تكون دي حجة يوقفك بيها لما حد يسرق موبايلك.. بس دا بيبقى ذوق لأنه بيديك موبايل بتلاتة
 جنيه و ربع تخلص بيه مصالحك 
بس أحيانا بيبقوا أندال برضو و بتاخدوا الموبايل أبو أربعة جتبه و ربع و يسيبوك تغنى ظلموه 

- إوعى تحط موبايلك على مكتبك فى الشغل مثلا أو على حاجة قدام باب الشقة؛ لأن زي ما قلتلك قبل كدة..
 مفيش حد صالح 

- لو هتسافر مدة طويلة بلاش تسيب الموبايل فى البيت لأنه بيكون عرضة للسرقة
- يستحسن تجيب موبايل بقارئ بصمة، و لو مفيش حاول تقفل موبايلك برموز حماية (Pattern)
و اقفل الشريحة برموز PIN و كهرب الـLock Screen 
- ممكن تودى الموبايل لحد يصلحه و ينام
 عليه أو يقولك ضاع، أو تديه لواحد صاحبك يديه لواحد صاحبه يعديه على واحد صاحبه جنبه واحد
 صحبه يعرف واحد جنبه واحد بيصلح موبايلات 
 - لازم اللى توديله موبايلك تكون عارفه أولاً، و يكون سمعته كويسة، و غير كدة و كدة تاخد منه
وصل مختوم بإنه استلم منك الموبايل، و يفضل طبعا إن التعامل معاه يكون بشكل مباشر، و بلاش
 جو ابن خالة أمى من أم تانية يعرف واحد هيوديهوله و الكلام الفاضي دا 
- فى المطاعم و الكافيهات
و الحاجات دى خلى موبايلك فى جيبك دايما، و بلاش تطلعه و تحطه قدامك على الترابيزة و الشغل دا
 لأن ممكن إما إنك تنساه أو حد يقتنيه لنفسه و يسيبك تتحسر عليه 
- متشحنش الموبايل برة البيت إلا فى الظروف القهرية، و لازم و حتما و لابد تقعد جنبه و تخلى عينك عليه،
 و يستحسن لو موبايلك عنده إسهال شحن إنك تجيب باور بنك علشان تشحنه و يبقى قدام عينيك 
- حاول تستخدم موبايل مناسب لطبيعة شغلك؛ يعنى مثلا لو انت بتشتغل شغلانة فيها تعامل مباشر مع الناس،
زي الدكتور أو الصيدلي أو موظف العلاقات العامة أو غيرهم، يفضل إنك تجيب موبايل رخيص و شكله ميشجعش على السرقة 
- كمان لو انت من الناس اللى شغلهم بيعتمد على التنقل كتير، زي اللى بيشتغلوا فى المقاولات
و أعمال البناء و غيره، حاول تجيب موبايل رخيص و يستحمل ظروف شغلك علشان لو وقع من
 ارتفاع عالي أو وقعت عليه حاجة ميبوظش، و علشان لو نسيته فى أي حتة برضو يكلموك تروح تاخد موبايلك 
------------

 بس يا سيدى.. و طبعا أولا و أخيرا دي حاجة بتاعة ربنا، لكن لازم الواحد ياخد حذره و يسيب الباقى على ربنا
 و ربنا ما يوريك منظر ولا شعور اللى موبايله مسروق 

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×