8107339487713063
recent
أخبار ساخنة

فيروسات الاندرويد حقيقة ولا هرى و كلام فاضى ؟

الخط

فيروسات الاندرويد حقيقة ولا هرى و كلام فاضى ؟



بسم الله الرحمن الرحيم

ناس كتير جدا بيسألونى عن برامج مكافحة فيروسات لموبايلاتهم الأندرويد لكن السؤال الأزلي اللى المفروض تسأله:
هل أصلا فى فيروسات للأندرويد؟


و الله حاجة زي دى بتعتمد على تعريفنا للفيرس أصلا 
الفيرس دا يا عم الناس عبارة عن كود برمجي (غالبا بيكون ملف واحد زي الزِّبلة ) و بيكون قادر على نسخ نفسه مرات كتير جدا بمجرد تفعيله.. و هو بيعمل العَملَة السودة دى ممكن يحذف بيانات أو يبوظ نظام التشغيل أو... بص.. هو بيعمل أي حاجة تقرفك

فى الأندرويد مفيش الكلام دا خالص؛ لأن باختصار أي ملف على الموبايل بيبقى محبوس زي الكلب
لغاية ما أبلكيشن معين يستخدمه أو انت تسطبه (لو هو ملف APK مثلا).

- الله! يعنى الأندرويد مبيتفيرسش؟!

حرفيا "مبيتفيرسش" لأ؛ لأن زي ما قلتلك.. مفيش فيرس بالمعنى الحرفي معمول للأندرويد
- أمال يا عم الناس اللى بتقولك فيروسات الأندرويد؟ و الإعلانات بتاعة "الروبوت الخاص بك مملوء بالفيروسات"
 و الكلام الفاضى دا؟ 
نصب يا ريس، و أوقات كتير بتكون بتضر الموبايل مش بتنفعه


- أمال يا عم الحاجات اللى بنسمع عنها و الحاجات اللى بتتسطب لواحدها و الحاجات دى إيه؟ مش فيروسات؟
.. فيروسات دى ولا مش فيروسات؟!
مش فيروسات 
دا نوع تانى من الـMalware 

- نوع تانى من إيه؟!!
آااااااه.. انت معندكش خلفية ولا إيه؟ 
المالوير دا عبارة عن برامج أو تطبيقات مضرة بالجهاز بتاعك أو ببياناتك،
 و الفيروسات نوع منها 
استنى.. يعنى انت تقصد..
أيوة.. الأندرويد ملوش فيروسات لكن بيصيبه أنواع تانية من المالوير 

بس مش فيروسات 

أنواع المالوير اللى بتيجى لأجهزة الأندرويد كتيرة، و كل نوع منها بيعمل مصيبة شكل 
- الله يطمنك 
---------

أولا: الـAd-ware

و دا زي ما واضح من إسمه بيقرفك بالإعلانات.. طبعا مقصدش الألعاب أو التطبيقات اللى فيها إعلانات.. دى أكل عيش ناس 
فى حاجات زي BlackMart بتعرض إعلانات سواء كنت فاتح التطبيق أو لأ،
كمان بتجيب Notifications بالإعلانات دى و تقرفك من ناحية تانية

الحاجات دى تقدر تقول عليها أخف و أهفأ نوع من أنواع الـMalware،
و حلها إنك تمسح التطبيق سبب المشكلة و الموبايل يبقى بريفكس 
-

ثانيا: الـSpyWare
دى بتكون تطبيقات شغلتها إنها تجمع الـCookies و البيانات بتاعتك و صورك أو صوتك أو مكانك أو ملفاتك المهمة
 و توديها الشلالات.. قصدى للهاكر ابن الجزمة اللى عمل المالوير 

الـSpyWare غالبا بيكون مش سهل فى اكتشافه؛ و دا لأنه بيكون مستخبى فى تطبيقات النظام مثلا أو مبيكونش ليه Shortcut فى قايمة التطبيقات اللى عندك.

موضوع الـSpyware دا بدأ يختفى بظهور أندرويد مارشميلو، و دا لأن النظام بيوريك كل الصلاحيات اللى بيطلبها
 كل تطبيق و بيسألك إذا كنت موافق تديله الصلاحيات دى ولا لأ

كمان ممكن تتجنب الـSpyware بإنك متحملش تطبيقات من برا الـPlay Store إلا من مواقع انت عارفها، و متدخلش على شبكات Wi-Fi متعرفهاش.. متبقاش زي الاهبل مبسوط بإنك بتفتح الشبكة بالـWPS أو لقيت شبكة مفتوحة.. عيب..
مش كل يومين ألاقى مركز شباب معمول فى الشارع و لاقط من الشبكة بتاعتى
-

ثالثا: الـRansom-ware

و دا بيكون عبارة عن حاجة زي قفل للجهاز بتمنع وصولك لأي بيانات أو تطبيقات إلا لما تدفع فلوس لحساب معين، و علشان تزود الساسبنس بتديك مهلة معينة بيتم بعدها مسح كل البيانات أو قفل الجهاز
أنا شفت الـRansomware دا على الكمبيوتر بتاعى، و خلصت منه بإنى سطبت ويندوز تانى.. كنت عامل خطة فى منتهى الذكاء و حاطط الحاجات المهمة على بارتيشن الـD
-

رابعا: RootKit

و دا ممكن تعتبره أوسخ و أغتت نوع فيهم، و بيكون عبارة عن حزمة تطبيقات كدة بتعمل روت للموبايل و بتثبت نفسها فى ملفات السيستم
فى مثال منتشر جدا للـRootKit دا اسمه HummingBad


المالوير دا فكرته إنه بيعمل روت للموبايل و بيحط ملفات فى السيستم و يبدأ يظهرلك إعلانات أو لينكات مقرفة أو يحمل تطبيقات منه لنفسه كدة 
-

خامسا: Android/PowerOffHijack

و دا غالبا بيكمل الـSpyWare، و فكرته إنك لما بتقفل الموبايل مبتقفلوش 
البرنس دا بيشتغلك لما بتقفل الموبايل و بيطفى الشاشة و بيخلى الموبايل يستموت خالص 
فى نفس الوقت الموبايل بيبقى شغال و بيبعت بيانات و بيسجل صوت و صورة و قشطة يعنى و الحياة حلوة 

المفاجأة بقى.. إن المالوير دا بيصيب الأجهزة اللى شغالة بأندرويد 5.0 أو أعلى






 خصوصا لو عامل روت..
 شكرا يا ((((هواوى)))) على إن التابلت بتاعى لسة كيتكات 

المالوير دا مش منتشر إلا إذا كنت بتحمل حاجات
 من مواقع صينية.. غير كدة صعب يوصلك

-
تطبيقات كتير من اللى بتفتح صفحات النت جوا الأبلكيشن نفسه (زي الفيس لما بيفتح اللينكات فى المتصفح بتاعه مثلا

 )
بتخليك عُرضة لتطبيقات المالوير أو ممكن تجيبلك تطبيقات انت مش عاوزها حتى لو مش مالوير.. إشتة جدن يعنى 
و دا اللى بيسموه UXSS Attack،
----------

سيبك بقى يا عم الشباب و الرياضة من الأنواع اللى فوق دي لأنها كتييييييرة جدا و مبتخلصش،
و تعالى لما أقولك تحمى نفسك من بُعبُع المالوير إزاى 

- متحملش حاجة من برا الـPlay Store (إلا من موقع موثوق زي APK-Mirror)
- متحملش أي حاجة من أي موقع صيني أو أي موقع بلغة انت متعرفهاش علشان متلبسش
- متديش أي حاجة صلاحيات الروت إلا إذا كنت عارف هى بتعمل إيه بالظبط و محتاجة توصل لإيه
- متحملش Lucky Patcher ولا Freedom ولا الحاجات دى إلا من المواقع الرسمية بتاعتهم...
 أو يستحسن متحملهاش أصلا 


- ممكن المالوير يجيلك فى صورة أبلكيشن تانى زي فيسبوك أو تويتر أو غيرهم..
لذلك متحملش الحاجات دى إلا من الـPlay Store


- متحملش من التطبيقات اللى بتديك الحاجات اللى بفلوس ببلاش زي Aptoide و Black Mart و الحاجات دى
- لو هتحمل حاجة مدفوعة شوفها الأول على Onhax.. نصيحة من أخ يعنى

- متحملش من مواقع صينية (دا علشان لو مشفتش النقطة دى فوق يعنى



)









اى خدمه يا رجاااله <3

  1. ازاي هيخترق الاندرويد ومعروف ان اللينكس صعب الاختراق ان وجد لانه نظام يتم بنائه بنفسك عكس الانظمة الاخري

    ردحذف

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

نموذج الاتصال
الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×