8107339487713063
recent
أخبار ساخنة

نصايح مهمة ليك قبل ما تفكر تشترى ايفون مستعمل

الخط








نصايح مهمة ليك قبل ما تفكر تشترى ايفون مستعمل




بسم الله الرحمن الرحيم

كلنا عارفين إن الأيفون جهاز شكلُه حلو وعليه تُفاحة حد أكل منها حِتَة ولزقها علي ضهر الأيفون وأكيد برضو عارفين
 إن سعرُه مُضر بالصحة ويُسبب الوفاة لمرضي القلب والمُصابين بنزلات البَرد  فـ لو إن الزهر لعب معاك
 وحبيت تشتري أيفون يبقي لازم تآخد المنشور ده معاك وأنتا رايح 


* عامةً هقول لك 10 نصائح لازم تاخد بالك منها وأنتا رايح تشتري أيفون! لكن ولا أنا بنصحك تشتري ولا ليا
مصلحة في كده ولا أي حاجة! ماشي؟  خالصين؟ خلاااويص! نبدأ؟! 

1- سعر الأيفون:


أجهزة آبل سعرها بيفضل علوضعه وماسك نفسه لغاية ما ينزل جهاز جديد يقدَّم اللي كان جديد (يخليه قديم يعني)
 فأنتا هتعمل خطة في منتهي الذكاء زي عم خيري وتنستني لما آي فون جديد ينزل وتشتري إصدار أقل منه؛
 لأن في مُعظم الأحيان بيبقي التغيرات اللي بين الأجهزة طفيفة .. زي الأيفون4 و الـ 4S كده.. تحس إنهم
 التوأم كريم وكرم  ولأنك برضو مش هتبقي ثري ثراء فاحش علشان تشتري الجديد وآبل بتنزّل أيفونها في
 سبتمبر فأنتا لو هتشتري تشتري بعدها بشهر علي الأقل، أو تستني السنة الجديدة أحسن علي ما الإصدار
 الجديد ينزل مصر ويشيلُه ولو ٣ حتي في البلد! 

...

2- سعة الجهاز الداخلية: 


تحديثات النظام بتستهلك سعة تخزينية كبيرة، وتحديثات التطبيقات كذلك؛ فـ لذلك متفكرش تشتري أيفون
 بذاكرة داخلية 16 جيجا مثلاً، أقل حاجة 32 جيجا.. علشان الـ 16 جيجا دول بيبقي متاح منهم حوالي 13.5 جيجا
 للمستخدم والـ 2.5 بيبقوا لنظام التشغيل نفسه، ودلوقتي الصورة الواحدة حجمها بيعدي حاجز الـ 2 ميجا بأكتساح
  فصعب إن الـ 13 جيجا يكفوا كل فيديوهاتك وأغانيك وصورك السلفي وأنتا مطلَّع لسانك 
*طبعاً آبل لَغِت الـ 16 جيجا بس إحنا بنتكلم علي إنك هتشتري أيفون مستعمل فممكن ييجي
 تحت إيدك 5S ولاّ حاجة!*
...

3- قَفل الـ iCloud:


دي أهم نصيحة علي فكرة! لأنك لو لبست في أيفون مقفول بالآي كلاود، يبقي هار بلاك مقَلِمْ أسود!
 لأن بكل بساطة يبقي أنتا أشتريت حتِة حديدة حلوة تزين بيها النيش بتاعكُم  ولو متعرفش إيه قَفل الآيكلاود ده!
فدي خاصية بتفعلها في الأيفون علشان لو أتسرق تقدر تسترجعُه أو تمسح بياناتك من علي بُعد وخِلافُه، ولو حد
 سرق أيفونك وهوّا عليه حساب iCloud يبقي هوا معاه حتِة حديدة مش هيعرف يعمل بيها حاجة! 
وعلشان متوقعش في الفخ ده عندك طريقتين:
١- لو الأيفون اللي بيتعرض عليك للشراء دا مفتوح عادي فعلي طول تدخل علي الأعدادات >> iCloud
وتتأكد إن خانة الـ ID والباسوورد فاضيين ..

٢- تآخد الـ IMEI بتاع الجهاز وتدخل الرابط ده : https://goo.gl/x5jkzq، وتشرف لو الجهاز مربوط
 بحساب آي كلاود فمتشتريهوش! أو مش مربوط بحساب آي كلاود فيبقي متشتريهوش برضو! 
...

4- الميَّة والأيفون والكلسـ.. أحم! :


لازم تتأكد من إن الأيفون لم يُمارس هوايتُه المُفضلة ووقع في أي ميَّة قبل كده! الأيفون لو وقِع في الميّة بيبقي فيه
 نُقط حمراء في مدخل الشاحن والشريحة والسماعات، ودي تقدر تشوفها عن طريق فلاش موبايل تاني،
...

5- قَفل الشَبَكة:


لازم تتأكد إن الأيفون مش مقفول علي شبكة معينه، لأن الأُخت الفاضلة آبل  بتعمل إصدارين من الآي فون..
 واحد مفتوح يشتغل علي أي شبكة (Unlocked) ونُسخة بتكون بعقود بينها وبين شبكات الأتصال؛ فبيبقي
مقفول علي شبكة مُعينة.. فودافون، إتصالات .. أو أورانچ، فتجرّب الجهاز علي أكتر من خط؛ علشان تتأكد من
 أنُه علوضعُه في النقطة دي وقادر يشتغل علي أي شَبَكَة 
...

6- فترة ضمان الجهاز:


ممكن الشخص اللي هتشتري منُه الجهاز يقول لك: دا خالي هريدي جابهولي لما كان بيعمل عُمرَة في كاليفورنيا
 من شهرين والجهاز لسه في الضمان وطبعاً عَمُه هريدي مخرجش عن الكَفر بتاعهُم ولا فيه عُمرَة بتتعمل
 في كاليفورنيا فهوا أكيد بيحوَّر عليك 
فـ أنتا هتدخل ع الرابط ده: https://goo.gl/MV71H1 وهتعرف منه الجهاز باقي علي ضمانُه فترة
قد إيه وعليه وصولات ميَّة وكهرباء ولا لأ! 
....

7- الأيفون حالتُه كويسة:


أتأكد من إن الأيفون مفيهوش خدوش، ولا إنُه نزل سلَّم ع الأرض قبل كده! ، وأتأكد كمان من إن زراير الجهاز شغاله،
وإن الكاميرا الخلفية شغَّالة كويس ومفيش مانع تاخُد شوية سلافي بالأمامية وتجربها ، وجرب الميكروفون في المكالمات، وسماعة المكالمات وسماعة الألعاب والڤيديو والهاند فري، والشاحن إتأكد إنه أصلي وبيشحن، وإن الكابل
مفيهوش قطع طولي أو عرضي أو عيل صُغير عَضُه أو عمل عليه ببي 
...

8- التحديثات:


لو إنك بتهتم بالتحديثات فأنصحك متشتريش أقل من أيفون 4S لأنه أقل جهاز وصل له الـ IOS 8 علي حد علم!
 أما الآي فون 4 فآخرُه كان الـ IOS 7 بس تقريباً! فلو مُهتم بالتحديثات حاول تجيب جهاز حديث علشان يكون
فيه تحديثات متوفرالُه 
...

9- الأيفون ده حقيقي ولا بجد؟


أتأكد من إن أعضاء الجهاز نفسه بتاعة نفسه بمعني إنك تتأكد إن كرتونة الأيفون بتاعتُه مثلاً، ودي عن طريق إنك
 تشوف هل رقم الـ IMEI بتاع الأيفون هوا هواه اللي علي علبة الجهاز ، وعلشان توصل للـ IMEI بتاع الجهاز
 أدخل علي Settings > General > About وقارنهُم بنفسك بقي  
...

10- أخيراً .. أتأكد إن الأيفون أصلي مش صيني ؛ لأن فيه شركات كتير شغاله تحت السلم وبتستخدم لوجو آبل ،
 ونفس تصميمها، بس ميقدروش ينسخوا الـ IOS بتاتاً ممكن يعملوا Theme بأيقونات شكل أيقونات الـ IOS
لكن كنظام تشغيل كامل فده صعب خالص مالص 
...


دول كانوا أهم النُقط اللي لازم تآخُد بالك منها وأنتا رايح تشتري أيفون يارب يكون الموضوع عجبكم و متنسوش
 الاشتراك فى النشرة البريدية اسفل الموضوع لمتابعه جديد المدونة

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

نموذج الاتصال
الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×