8107339487713063
recent
أخبار ساخنة

تعرف على جميع انواع فيروسات الكمبيوتر Malicious Software

الخط

تعرف على جميع انواع فيروسات الكمبيوتر (Malicious Software)



بسم الله الرحمن الرحيم

فيروسات الكمبيوتر.. كلمة لمّا تسمعها أكيد لازم يخطُر في بالك صورة لواحِد مشغّل الأنتي فيروس؛ يعمل Scan لجهازُه وبيحاول جاهداً أنُه يلاقي الفيروس الرخِم اللي مطلّع عينُه ومخَلي الكمبيوتر بطئ، وبيعرض لُه إعلانات وقارفُه
 في حياتُه علشان يوصل لُه ويحذفه علشان مينسَخش نفسه ويتكاثر ويكتَر ويرتَع ويمرَح في الكمبيوتر! 
لكن أاا.. ثواني.. 

هل الفيروس اللي بيعرض إعلانات هوا هوا اللي بينسخ نفسُه؟
وهوا نفسه اللي بيحذِف له ملفاته من ع الهارد؟
وهوا برضو اللي ممكن يكون بيتجسس عليه؟
الإجابة هيا: لأ.. مش واحد!
إزاي؟

هقول لك الموضوع كله سريعاً كده..

البرمجيات الخبيثة أو الـMalware، أختصار لكلمتين هُمّا: Malicious Softwaree،
الكلمتين مع بعض معناهم بالعربي: برمجيات خبيثة!

بتعمل إيه البرمجيات دي؟

 البرمجيات دي ممكن تعمل أي حاجة في جهازك، سواء: تهنَج لك الكمبيوتر وتخليه يتشنج وميقبلش أي أوامر منك،
 تعرض لك إعلانات رخمة تكرهك في نفسك، أو حتي تجمع بيانات حضرتك وتبعتها للهاكر الجميل وأنتا مش عارف!..
 بياناتك اللي هيا باسووردات حساباتك وأرقام الكريدت وكل الحاجات دي!!

 وتقدر بعض البرمجيات إن الغرض منها يكون ربحي عن طريق أنها تتتبع تصفحك للمواقع وتعرف
أهتماماتك والكلام ده كله وعلي أساسُه تعرض لك إعلانات موجهة أكتر فتشِد رجلك أكتر..

 وكمان لو تَم توجيهها لشركةٍ ما فـ بيكون الغرض من التوجيه ده إما تدمير الشركة دي أو تعطيلها لفترة،
أو سرقة بيانات العملاء بتاعتها، أو لحاجة في نفس الهاكر وبيقضيها! ممكن يكون عاوز يظهر شبحَنتُه مثلاً لحَد معين..
زي ما أتكلمنا قبل كده وهنتكلم برضو بعدين 

بتيجي منين؟

البرمجيات دي بيتم إدخالها للكمبيوتر بأكتر من طريقة بدايةً من إنها ممكن تتنقل لك من فلاشة USB،
أو تجيلك في رسالة ع النِت كأنها صورة لمّا تفتحها يبقي علي جِهازك السلانكاتية، أو عن طريق أي جهاز تاني
معاك ع الشبكة تعمل لنفسها Invite وتقعُد تشرب شاي مع ملفاتك.. ماهوا بقي بيتها الجديد بقي! 

 والبرمجيات دي بنتعامل معاها (مع أختلاف تركيب ووظيفة كل واحد عن التاني) علي أنها: فيروسات..
فيروسات ولازم نخلص منها! 
لا نعرف اللي سبب مشكلة كذا ده أنهي فيروس؟ ولا اللي الأنتي فيروس جاب لي تنبيه عنه ده أنهي واحد؟
مبدأياً كده فالبرمجيات دي بتنقسم لـ77 أنواع غير بَعض، وهُمّا كالتالي:
1) الـKeyLogger:

بالعربي أسمُه (مُسجِل ضربات لوحة المفاتيح) وبالأنجليزي KeyLoggerr.. البرنامِج (البرمجية) دي وظيفتها بسيطة خالص؛ بيراقِب ويسجل كل حرف بتكتبه علي الكيبورد ويحفظ منه نسخة علي جهازك وبكل سهولة
 بيبعتها للهاكر لمّا جهازك يتوصل بنِت.. يعني لو إن عندي KeyLogger ع الجِهاز اللي بكتِب
 منه ده كان زمانه أحتفظ بكلام كتير أوي أوي الصراحة، وبعتُه للهاكر الجميل، والهاكر كان ممكن عمل صفحة
 أسمها مثلاً (WikiHack) وكتب فيها المنشورات اللي بتنزل هنا، قبل ما تنزل هنا.. تخيل؟! 

2) الـTrojan Horse:

يعتبر (حصان طراودة) اللي بيدلعوه ويقولوا لُه Trojan واحد من أكتر البرمجيات إنتشاراً؛ وده لأنُه
 في الأول بيظهر علي أنُه برنامج شرعي ومُسالِم ومفيش منه أي ضرر.. لكن أول ما يدخل جهازك
بيخلي المُهاجِم (الهاكر) يتحكم بكل حرية في جهازك..

سبب تسميته بـ حصان طراودة راجِع لأسطورة بتقول إن الأغريق لمّا كانوا محاصرين مدينة طراودة أستخدموا
حيلة حلوة علشان يخترقوا المدينة. الأغريقيين عملوا حصان خشبي كبير جداً علشان يقدموه كهدية للطراوديين
 وأنهُم خلاص هيفكوا الحصار عنهم وكده.. لكن الحصان الخشبي ده كان من جواه ملياااان مُحاربين..
 الطراوديين قبلوا الهدية من باب إن ( النبي قبِل الهدية  ) ودخلوا الحصان المدينة وأحتفلوا 
وشربوا سينا كولا وبقي أغلبهم سكرانين..

فـ لمّا أغلب سكان المدينة سكاري المحاربين اللي جوه الحصان أقتحموه وخرجوا وتسللوا وفتحوا بوابات المدينة
علشان باقي الجيش يدخل، ودخل الجيش وسقطت طراودة في واحدة من أدهي الحيل الحربية علي الإطلاق..
ماهوا أصل بذمتك.. حَد يحتفل ويشرب سينا كولا؟

فـ بنفس الفكرة دي بيشتغل التروجان علي جهازك.. بييجي لَك علي أنه برنامج بريء ومسالم، لكن أول ما
 بيدخل جهازك يبقي كأنك سلمت جهازك للهاكر الجميل يتحكم ويعمل فيه اللي هوا عاوزه!

3) الـRAT:

أداة الإدارة عن بُعد أو الـRemote Administrator Tool بيسموها أختصاراً RAT، ودي ببساطة
واحدة من أخطر البرمجيات اللي ممكن الدنيا_القاسية و غدر_الهاكرز يعلموا عليك بيها؛ لأنها بتمكن الهاكر
 الجميل أنُه يتحكم في جهازك عن بعد ويعمل فيه اللي هوا عاوزه.. بل أنُه ممكن يثبت  KeyLogger
ويمسح أي ملفات هوا عاوز يمسحها، ويطفي الكمبيوتر ويشغلُه، أو يعمل في جهازك ما لا يُحمَد عُقباه!

4) الـvirus:

مين ميعرفش عمو الفيورس اللي بيطلّع عيننا يا ولاد؟ 
 برمجية جميلة كده بتتكتب ويتم تطويرها علشان تهاجِم الجهاز بتاعك وتعمل أي حاجة هيا متطورة علشان تعملها..
 يعني لو الفيروس ده مكتوب علشان يمسح ملفاتك مثلاً فـ هيمسح ملفاتك.. لو مكتوب علشان يضر
قطع هاردوير جهازك بيضُرها.. لو مكتوب علشان يقعد يشرب شاي مع الملفات بيعمل
 شاي ويقعد يشربُه مع الملفات.. عادي يعني!

5) الـWorms:

الـWorms أو الديدان.. كلمة مش لطيفة أوي ومتشجَعش واحد زيي مستني يخلّص كتابة المنشور
 علشان يتعشي علي أنُه يتعشي بعد ما يخلص.. بس قشطة..

 الديدان دي -زي ما أتكلمنا عنها قبل كده- بيبقي الغرض منها أخطر من مجرد تخريب ملفاتك،
 وبتتنقل لَك أسهل من أي نوع تاني من البرمجيات.. يعني تقدر تيجي لحضرتك عن طريق إتصالك بالنت.. 

 يعني بمجرد ما الجهاز يكون متوصل بالنت فبيبقي مُعرّض لإن الديدا دي تجيلُه.. بمجرد إتصالك بالنِت
 الديدان دي بتبقي قادرة إنها تدفَع نفسها وتدخل جهازك.. وتشغل نفسها لوحدها من غير أي تدخل منك..
والديدان دي بتتكاثر ذاتياً بدون الحاجة لأي تدخل منك علشان تتنسخ..

بتعمل إيه؟

 الديدان دي قادرة أنها تجند جهاز حضرتك لصالح الهاكر اللي عاملها، وتخليه تحت تصرفُه في أي وقت يحبُه..
بتجندُه فيما يعرف بالـBotnet واللي من خلالها يقدر الهاكر أنُه يستخدم جهازك في شَن هجمات الحرمان من
الخدمة زي اللي أتكلمنا عنها قبل كده واللي أتسببت في أنقطاع الكهرباء عن 50 مليون إنسان في 2003..
 هتلاقي رابط البوست في أول كومنت تحت!

6) الـAdware:

برمجية الإعلانات أو الـAdwaree، واحدة من أبشع البرمجيات اللي ممكن تجيلك؛ لأن الآد وير
دي وظيفتها إنها تطلّع عينك عن طريق أنها تعرض لك إعلانات تقرفك في عيشتك.. واللي غالباً بتبقي إعلانات
 إباحية وياويلك بقي لو أتعرض لك أي إعلان من دول لمّا يكون حَد من والديك الأعزاء قاعدين جنبك.. يااااه..
غالباً هيكسر شاشة الكمبيوتر برآس حضرتك الكريمة 
 ظناً منُه إن أبنُه تربية إيدُه بقي فاسق داعِر قالِب البيت خمّارة،
 وميعرفش إن ده برنامج وسـ* عاملُه واحِد لا مؤاخذه وسـ* برضو علشان يقرفك في عيشتك ويهِز صورتك
المحترمة قُدام والديك، واللي لو مكسروش برآسك أحد قطع هاردوير الجِهاز فـ أحتمال يحرموك من إشتراك
 النِت شهرين قُدام 
وفي حالة إن البرنامج كان لطيف معاك وعرض لك إعلانات بنت ناس محترمة
فـ ده بيبقي لأنُه بيعتمد علي حاجة تانية وهيا:

7) الـSpyware:

برامج التجسس المشهورة بالـSpaywaree، برمجيات الغرض منها إنها تجمع بيانات عن أستخدامك
 للجهاز وتتابِع تاريخ تصفُحَك للجهاز History وأهتماماتك أو الـCookies؛ علشان يبعتوا لَك علي
 أساسها إعلانات موجهَة أكتر ليك وبتلبي إحتياجاتك اللي كنت بتدوّر عليها.. يعني مثلاً كنت في
يوم بتبحث في المتصفح عن (سماعة بلوتوث للمكالمات والأغاني) فتلاقي الإعلانات اللي
 بتتعرض لك كلها عن سماعات بلوتوث!
والأسوء من ده وده إن السباي وير دي ممكن تتجسس علي بيانات حضرتك الحساسة!
لأ! مش هتعرف إنتا بتحب أنهي لون في الشرابات يعني؟ هيا دي بيانات حساسة برضو؟ دي بيانات مقرفة!
 بيانات حساسة يعني أي باسووردات بتسجل دخول بيها في أي مواقع، أو أي أرقام فيزا أو كريدت
بتستخدمها أو أي بيانات يقدر الهاكر الجميل يستفيد بيها!
بس كده.. 

هُمّا دول الـ7 أنواع اللي ممكن يصيبوا جهازك..
هنتكلم بقي عن إزاي الفيروسات دول بيهاجموك؟
وبعدين إزاي تحمي نفسك منهم؟ 
وليه لازم تثبت أنتي فيروس قوي؟

هنتكلم ونقول إن الـ...... إيه؟

 كفاية كده النهارده؟ ماشي.. نكمل بعدين.. 

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

نموذج الاتصال
الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×