-->
U3F1ZWV6ZTEwOTc2NjM5NDkwX0FjdGl2YXRpb24xMjQzNTAxODM2NjQ=
recent
أخبار ساخنة

تعرف على تقنية Ois لمنع الأرتعاش و الصور المهزوزة






تعرف على تقنية Ois لمنع الأرتعاش و الصور المهزوزة


السلام عليكم و رحمه الله و بركاته

لما بتدور فى مواصفات معظم الموبايلات الـFlagships الجديدة بتلاقى كلمة OIS مكتوبة بخط كبير
جدا جنب الكاميرا، فبتقول إن أكيد دى حاجة حلوة علشان كدة كاتبينها بخط كبير يعنى 
لكن إيه الـOIS دا؟ و بيعمل إيه أصلا؟

الـ3 حروف OIS عبارة عن اختصار لـ3 كلمات.. Optical Image Stabilization
 أو تثبيت الصورة البصري

باختصار و من غير كتر كلام  و انت شايل الكاميرا بتاعتك أو الموبايل بتاعك و بتحاول تصور مشهد معين
 أو حاجة معينة عاجباك طبيعي إن إيدك مش هتبقى ثابتة زي ترايبود الكاميرا مثلا و بالتالى الكاميرا هتتهز
 بشكل بسيط جدا نتيجة لحركة إيدك و انت بتصور، لكن الكاميرا فعليا "بتصور" لما بتدوس على زرار الـShutter،
سواء كنت بتصور بموبايل أو بكاميرا DSLR تمنها آلاف الجنيهات..

لو الكاميرا مفيش فيها OIS، فى الغالب لو حركة إيدك زادت عن حد معين أثناء ما بتدوس على زر الـShutter،
و بالذات فى اللحظة اللى سنسور الكاميرا بيلقط الصورة، بتطلع الصورة مهزوزة و ضايع تفاصيل كتير منها 
حلا للمشكلة دى، الشركات اللى بتعمل الكاميرات الرقمية (و بالذات كاميرات الموبايلات) فكرت فى حل للموضوع دا
و قالوا المشكلة إننا دايما بنعمل السنسور بتاع الكاميرا و العدسة بتاعتها ثابتين، و دا اللى بيسبب المشكلة.. طيب..
 إحنا ممكن نخلى عدسة الكاميرا حرة الحركة، و نخليها كمان تتحرك بنفس المقدار اللى بتتحركه إيد الزبون اللى بيصور
 لكن فى اتجاه معاكس (دا على اعتبار طبعا إن إيدك بتتحرك حركة بسيطة جدا و ممكن يعوضوها،
و إنه مبتشتغلش الموبايل و تقعد تهز فيه علشان تجرب الموضوع دا)

و من هنا ظهر موضوع OIS، لكن النظام دا بيشتغل إزاي أصلا؟

- الكاميرات اللى فيها نظام OIS بتكون عدسة الكاميرا اللى فيها حرة الحركة زي ما قلتلك من شوية
 (عدسة الكاميرا دى غير الإزاز اللى مغطي الكاميرا من برة)
- العدسة دى متوصلة بشوية Micro-controllerss بتحرك العدسة فى اتجاهات مختلفة
 عكس الاتجاه اللى إيدك بتتحرك فيه

صورة توضيحية


- الـMicro-controllers دى بتعرف اتجاه حركة الموبايل من مستشعرات زي الـGyroscopee،
و بالتالى بتحرك الكاميرا على حسب اتجاه الحركة اللى بيجيلها من الـGyroscopes اللى قلتلك عليها
 بحيث إن العدسة تكون ثابتة تقريبا على الرغم من حركة إيدك
جدير بالذكر برضو إن الـOIS معمولة علشان تعوض اهتزاز إيدك انت (بما إن الموبايل بيتهز هو كمان)
 لكن لو بتحاول تصور مشهد متحرك زي عربية بتتحرك مثلا أو عيل بيلعب فى مناخيره، هتلاقى إن الـOIS
ملوش أي لزمة تقريبا، و مبيعرفش يعوض حركة المشهد اللى بتصوره نفسه 

طيب.. أنا قلت لك من شوية إن المفروض إن إيدك متتحركش أثناء ما مستشعر الكاميرا بيلقط الضوء
 من خلال العدسة 
الفترة اللى مستشعر الكاميرا بيتعرض فيها للضوء دى اسمها Exposure timee أو (وقت التعريض)... مع العلم إن الموضوع لا دخل له بالإعلام المصري خالص  و اللى بيحدد الوقت
دا حاجة اسمها Shutter Speed (أو سرعة الغالق)
باختصار برضو، لو بتصور فى ظروف إضاءة كويسة زي نور النهار أو ضوء قوي، سرعة الغالق بتكون كبيرة جدا
و بالتالى الـExposure بيحصل لفترة قصيرة جدا؛ و بالتالى احتمالية إن إيدك تتهز أثناء الفترة دى بالذات قليلة جدا
 لذلك أي كاميرا موبايل ممكن تطلع صور كويسة جدا فى الإضاءة الكويسة، كمان الـOIS مش هيفرق
بشكل ملحوظ فى جودة الصور اللى بتصورها فى إضاءة كويسة

أما فى الضلمة، و فى ظروف الإضاءة السيئة فترة الـExposure بتزيد جامد لأن الـShutter Speed
 بيقل علشان السنسور بتاع الكاميرا يوصل له أكبر قدر ممكن من الضوء؛ و بالتالي هتلاقى إن الصورة
اللى بتصورها فى الضلمة أوقات كتير بتطلع مهزوزة؛ ولهذا خُلِقَ الـOIS 

كل الكلام اللى اتكلمناه عن الـOIS دا يخص الصور الثابتة.. طيب و بالنسبة للفيديو؟!!!

الفيديو بيشتغل بحاجة اسمها Digital Image Stabiliztion، و دا فكرت أبسط من الـOIS بكتير
كمان مبيحتاجش اللفة الكبيرة دى غالبا...

فكرة الـDigital Image Stabilization بتاعة الفيديو دى هى إن الموبايل بيلقط Footagee
 بريزليوشن أكبر من اللى بتصور بيه (لنقل مثلا إنك بتصور بدقة 1920*1080.. سنسور الكاميرا هيصور
 بدقة أكبر شوية منها.. لنقل مثلا  2120*1280 )

و بعدين يروح واخد الـ1920*1080 بتوعك من دول لو بتتحرك حركة قليلة جدا فى حدود الـResolution
 الكبير اللى الموبايل بيصور فيه؛ و بالتالى بتقلل الاهتزاز اللى بيحصل فى الكاميرا و بتخلى حركة الفيديو
انسيابية لو بتصور فيديو و انت ماشي أو حاجة
لاحظ إنى فى المثال دا عما أقول مثلا مثلا لأن الأرقام دى بتختلف جامد من سنسور للتاني و من موبايل للتاني 
كاميرات تانية بيكون فيها مستشعرات كاميرا مش قوية أوي.. دى بتعمل الـDIS دا عن طريق إنها بتصور الفيديو
 بدقته الأصلية عادي جدا، لكن بتعمل ZOOM بدرجة بسيطة و بالتالى بتاخد جزء من الفيديو و تعمل له Upscale
 و تخليه بالدقة اللى انت مصور بيها (موبايلات كتير من Huawei بتشتغل بالطريقة الأخيرة دى)

 الـOISS فكرته قائمة على إنك تحرك عدسة الكاميرا فى عكس اتجاه حركة الموبايل
 و بالتالى تعوض أي رعشة أو اهتزاز فى إيدك
- أي كاميرا بتطلع صور حلوة فى الأإضاءة الكويسة، لكن فى الإضاءة الضعيفة الـOIS يحكم 
- الـOIS اتعمل علشان يصلح اهتزاز إيدك مش اهتزاز المشهد اللى بتصوره

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×