باى باس كوماند ببجى موبايل Command Pubg Bypass بدون باند دخول سيرفر الموبايل

كل ما تود ان تعرفة حول المحتوى المتكرر الـ(Spam)

بتجيلك رسايل مش عاوزها علي البريد، أو حتي علي الموبايل؟ عمرك سألت إيه هيا وبتجيلك ليه؟ 

سمعت عن مصطلح الـSpam ومتعرفش إيه هوا؟ تعالي أقول لك إيه هوا.. منين، وليه بيجيلَك؟! 

 إيه هوا الـSpam ؟

بادئ ذي بدء فـ مصطلح الـSpam (بتتنطق "سبام" بالعربي، وترجمتها "الرسائل الغير مرغوب فيها") ملهوش أي تعريف محدد، لكنه بيوصف أي رسالة بتجيلك من حَد أنتا متعرفهوش (مجهول يعني)، عن حاجة أنتا مطلبتهاش.. سواء لغرض تُجاري، أو للنصب عليك، أو حتي لمجرد إنها تزعجك وخلاص.. رسايل بتجيلك في تبويب الـjunk mail..بمعني..

 أي رسالة بتجيلك ع البريد زَي: "أنا (لوى وانج) مسئول بالبنك الدولى فى تاى بى بتايوان أعرض عليك المشاركة
 فى إعادة توجيه تحويل مصر فى جاء إلى البنك بطريق الخطأ وسوف أسهل لك هذه المهمة دون حدوث أية مشاكل قانونية وسوف تحصل على 70% من المبلغ مقابل 30% لى." أو اللي يبعت يقول لك: "أنا (أندرسون سميث)
أعمل لدى شركة ياناصيب أوروبية، يمكننى أن أجعلك تفوزى بالجائزة السنوية للشركة على أن نقتسمها
سويا بنسبة 50% لكل منا، فكرى بالأمر وإذا وافقت اتصل بى على الإيميل الشخصى المرفق".

أو الرسالة المشهورة جداً اللي جَت للمصريين علي كل موبايلاتهُم اللي
بتقول: "يا محمد أنزل لقينا مقبرة فراعنة فيها 7 عرايس ذهب و13 حجرًا عايزين نبيعهم" وكل الهَري ده طيب..

- إيه الرسايل اللي مش Spam؟

أي رسالة جاية ليك من واحد صاحبك..

رسالة جاية ليك من الجامعة/الشُغل أو أي جِهة أنتا عارفها..

أي رسالة جايه ليك من حَد إنتا مش عارفُه، لكنُه بيكلمك علشان موضوع محدد أو بيستفسر عن حاجة منك..

- ليه الـSpam أتسمي Spam؟ 

 القصة ورا تسميتُه بالأسم ده إنه كان فيه نوع من اللحمة أسمه علي نفس أسم بطل قصتنا النهارده.. (Spam)!
النوع ده من اللحمة كانت بتقدمه شركة أغذية أسمها Hormel.. المهم.. كان فيه فرقة  أسمها (مونتي بايثون)
كانت بتقدم عرض كوميدي أحداثُه عَن شَخص بيدخل مطعم مخصوص ببيع لحمة السبام دي، وكان لمّا ييجي
يطلب حاجة غير السبام، يقعدوا يصرخوا بصوت عالي: "سبام سبام سبام" فمكانش الشخص ده بيعرف يتكلم
 بسبب الإزعاج اللي بيحصل ده. ومن ساعتها وأتعرفت كلمة Spam علي أنها الحاجة المتكررة أو المُزعجة..

- منين ممكن يجيبوا إيميلك؟

الـspammers أو اللي بيبعتوا السبامات بيجمعوا الإيميلات عن طريق المواقع والمنتديات، أو أي مواقع
من اللي بيبيعوا بيانات المستخدمين بتوعهم، وأي مكان يقدروا من خلالُه يجمعوا أكبر قدر من عناوين الإيميلات
 علشان يبعتوا لهم رسايل الـSpam اللي في أغلب الوقت بيكون الغرض منها ربحي عن طريق أنهم يبعتوا لك
عروض علي منتجات أو خدمات وعليها خصومات وخِلافُه..

الموضوع مبياخدش وقت من الـspammers.. يعني بكام ضغطة زرار ممكن يبعتوا لملايين الإيميلات نفس الرسالة الواحدة.. وتخيل لو شوية من اللي بيتبعت لهم الرسايل دي يتجاوبوا معاها ممكن السبامرز دول يحققوا مكاسب أد إيه؟

- ليه رسايل الـSpam ضارة؟

 بص يا سيدي.. السبام مُقرف لكذا سبب.. أنتا بيجيلك رسايل سبام كتيرة أوووي، ودا بيستهلك منك وقت كتير علشان تمسحهم.. زائِد (+) إن الرسايل دي (اللي مش مهمة) لأنها بتجيلك كتير فـ بتأثر علي رسايلك اللي بتيجي (المهمة)
وتخلي وصولك ليها صعب، بَل إنك في أغلب الأوقات ممكن تحذف الرسايل المهمة مع اللي مش مهمة.

وكمان ممكن الرسايل دي تكون متلغمة بروابط لتحميل برامج ضارة ممكن -وبكل سهولة
تعمل معاك السليمة لو فتحت الروابط دي! 

- تعمل إيه علشان تتجنب الـSpam؟

 فلتر إيميلك عن طريق أنك تخلي أي رسالة مش مهمة بالنسبة ليك وتجيلك من أي جِهة تروح
للمحذوفات أو أي فولدر تحدده علي بريدك..

متنشرش أيميلك في أي منتدي أو موقع عام..

متردش علي أي رسالة سبام تقابلك ولا تفتحها أو تآخد أي إجراء معاها وأحذفها علي طول..