-->
U3F1ZWV6ZTEwOTc2NjM5NDkwX0FjdGl2YXRpb24xMjQzNTAxODM2NjQ=
recent
أخبار ساخنة

كيق يتم تنظيف شاشات الأجهزة LCD



كيق يتم تنظيف شاشات الأجهزة LCD


السلام عليكم و رحمه الله و بركاته

كتير مننا (أو خلينا نقول كلنا) عندنا موبايلات بتشتغل بشاشات لمس، أو لابتوبات أو كمبيوترات فيها شاشات LCD
 أو تليفزيونات LCD... المهم إن الشاشات دى كلها بتبقى رخمة جدا لو اتوسخت، و بتبقى أرخم لو حاولت تنضفها
و ممكن متنضفش أو تتوسخ أكتر من الأول...

بص يا سيدى.. كلامنا النهاردة عن إزاي تنضف شاشات الأجهزة اللى عندك، لكن الموضوع دا على الرغم إنه تافه تفاهة الأستاذ أحمد موسى، إلا إنه مهم لناس كتير (على الأقل مهم بالنسبة لى)

المفروض إن الشاشات بتتنضف إزاي؟

لو عندك موبايل بشاشة لمس فعلشان تنضفه من البصمات و الميكروبات هتروح تجيب قماش Microfibers
 و تجيب كحول Isopropyl 99% و تبل القماشة بيه بحيث تبقى مجرد "رطبة"، و تبدأ تمسح الشاشة
 بحركة دائرية علشان تغطي كل الأطراف... و ....

الحاجات دى سهل جدا تشتريها من أي محل نضارات أو إكسسوارات كمبيوتر، لكن ممكن لأي سبب من الأسباب متعرفش تجيب الحاجات دى... إما لأنها مش موجودة فى محلات حواليك، أو لأنها موجودة بس غالية، أو لأن عندك أخ صغير بيشرب الحاجات دى! 

الأمريكان مثلا لما حبوا يطلعوا بحلول جديدة و رخيصة لتنضيف الشاشات قالوا لك "استخدم فلاتر القهوة"
فلاتر قهوة إيه يا حبيبى؟ هو احنا متربيين فى Starbucks؟! 

طيب الحل إيه دلوقتى؟!

علشان تنضف أي شاشة حاول تبعد عن المناديل الورق بتاعتنا دى بقدر الإمكان... ليه بقى؟
المناديل دى معمولة بحيث تتحلل بسرعة و متسببش تلوث لفترة كبيرة؛ و لأنها معمولة من الورق كمان هتلاقى فيها ألياف رفيعة جدا بتفضل على الحاجة اللى بتمسحها بيها (حتى لو لاحظت هتلاقيها بتتهرى فى جيبك)؛ إذن المناديل الورق متنفعش لتنضيف أي حاجة مفترض إنك تشوف من خلالها (و بالذات النضارات)..

أمال أمسح الشاشات بإيه؟

بص يا سيدى.. المفروض إن الحاجة اللى هنمسح بيها الشاشة دى تكون ناعمة علشان الشاشة ماتتجرَّحش، و فى نفس الوقت تكون ماسكة بعضها علشان متسيبش "هَري" على الشاشة و توسخها بدل ما تنضفها!

علشان كدة دى شوية اقتراحات بستخدمها أنا أو حد من اللى أعرفهم، و شايف إنها كويسة جدا...

- بكرر تاني... الحاجات اللى كلمتك عنها فوق دى هى أفضل حاجة تنضف بيها الشاشة، و متوفر إلى حد كبير و مش غالية خالص، و ممكن تلاقيها فى أي محل باع إكسسوارات كمبيوتر، لكن فى حالة إنك مش عارف تجيب القماش و الكحول المخصصين لتنضيف الشاشة لأي سبب، دى شوية حلول...

- المناديل اللى بتيجى مع النضارات... شوف أي حد من أصحابك بيلبس نضارة و خد المنديل بتاعها و امسح بيه الشاشة، و بعض النضارات بيجى معاها سائل فى بخاخة (دا Iso Propyl برضو)، و مفيد لو هتمسح بيه أي سطح إزاز

- هات بكرة شاش طبي من أقرب صيدلية ليك (أكبر بكرة شاش تمنها 2 جنيه تقريبا!  ) و اتنى الشاش دا على بعضه بحيث يبقى 5 أو 66 طبقات و امسح بيه!

- كمان ممكن تجيب شاش معقم، و دا بيبقى أنضف شوية من الشاش العادي و بيبقى أمتن و أتخن و ممكن يستحمل كتير (سعر القطعة 10سم * 10سم تقريبا 3 جنيه)

- هات مناديل مبللة (أنا سألت واحد صاحبى فى مدرسة لغات و قال لى إن اسمها Wipes).. و سيبها شوية تنشف فى الهواء، و امسح بيها هتلاقى الدنيا فل معاك، و ممكن لو عاوز تمسح حاجة لازقة فى الشاشة تمسح بالمنديل و هو مبلول عادي (بس الكلام دا فى شاشة الموبايل بس.. شاشة التليفزيون أو الكمبيوتر حاول تبعد عنها أي سوائل بقدر الإمكان)

- امسح شاشة الموبايل فى رجل البنطلون! 

أيوة.. الحركة دى إحنا بنعملها لا إراديا، و هى صح جدا مش غلط (إلا لو البنطلون كان أبيض.. ساعتها هتندم أشد الندم )

- فانلة قديمة أو تيشيرت قديم مثلا هيقضى الغرض، بس حاول إنه يكون قطن بقدر الإمكان...

- لو زنَّقت معاك خالص ممكن تمسح بفردة شراب! 

و الله بكلمك بجد.. الشرابات بتبقى معمولة من خامات سهل تمسح بيها الشاشة زي القطن مثلا، و دا أحد الحلول الرخيصة جدا، بس ياريت الشراب ميبقاش مستعمل.. دا لمصلحتك انت يعنى 

طيب الكلام دا للبصمات و التراب و الحاجات الأي كلام دى، أمال البكتيريا و الميكروبات و ابن أختك اللى بيمسك الموبايل و إيده معكوكة مكرونة بالبشاميل؟ 

هتمسح الشاشة بنفس الكلام اللى قلنا عليه فوق دا، لكن هتحط على القماشة إما كحول أيزو بروبيل (و كمان مرة.. الكحول دا رخيص مش غالي)، أو كحول إيثيل (سبرتو أبيض من بتاع الجروح)، و يكون بنسبة بسيطة برضو لأنه بيبقى بنسبة 70% بس كحول و 30% مياه أو محول ملح...
الكلام دا لشاشة الموبايل أو التابلت لأن الشاشة نفسها بتكون مش معرضة للسائل، لكن مع التليفيزيون أو اللابتوب استخدم قماشة رطبة بس...


تعليق واحد
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×