ليه المشاهير بيستخدمه تويتر و مش بيستخدمه فيس بوك ؟

ليه المشاهير بيستخدمه تويتر و مش بيستخدمه فيس بوك ؟

    ليه المشاهير بيستخدمه تويتر و مش بيستخدمه فيس بوك ؟



    كتير بنشوف حسابات المشاهير على تويتر و بنلاقيهم يتفاعلوا معاها أكتر من الفيسبوك، بل إن أوقات كتير بتلاقى الفنانين
     و الـYoutubers بيدوك أكاونت تويتر بتاعهم مش فيسبوك.. عمرك فكرت قبل كدة إيه ممكن يكون السبب فى كدة؟ 
    خالص؟ 
    طيب يا سيدى.. أنا هقولك شوية أسباب كدة و عاوزك تدينى رأيك برضو 
    -

    - أحد الأسباب هو إن الأخبار أو الصور أو التويتات بتنتشر على تويتر أكتر من Facebook 
    طبعا الموضوع نسبي، و معظمنا لما بيعمل حساب على تويتر مبيلاقيش كلبة تعبره  لكن على الأقل لمعظم المشاهير
     بيكون الموضوع على تويتر بشكل أكبر
     كمان طبقا لدراسة عملها واحد اسمه Dan Zarrella شغال فى الإحصائيات
     و الكلام الفاضي اللى مبيأكلش عيش دا 
    لقوا إن إقبال مستخدمى تويتر العاديين على الشير (أو الـRetweet) 
    أكبر من قابلية معظم الناس التانية على باقى شبكات التواصل الاجتماعي..
    اللى بيعملوا الإحصائيات دى ناس فاضية بشكل غبي 
    -

    كمان موقع Facebook بيفرض عليك قيود غبية.. زي مثلا إن عدد الأصدقاء بتوعك ميعديش 5000،
    و دا رقم قليل جدا لو انت مشهور؛ و بالتالى هتلاقى معارفك أكتر من العدد دا بمراحل 
    و بالتالى برضو مش هتقبل أي Friend Request من أي حد؛ و دا معناه برضو إن المتابعين بتوعك
    مش هيعرفوا يعملوا كومنتات على صورك و بوستاتك فى الغالب
    هتقولى يعملوا صفحات؟
    إدارة صفحات الفيسبوك مش سهلة إطلاقا بالمقارنة بالأكاونت العادي بتاعك، سواء على فيسبوك أو تويتر؛
    و حتى لو فتحوا الرسايل ممكن أي حد يبعت رسالة حتى لو Spam؛ و بالتالى هيكون الرد على الرساليل صعب جدا
    الكلام دا كله على عكس تويتر، و اللى بيسمحلك بعدد غير محدود من المتابعين،
    و مبيسمحش لحد يبعتلك رسايل غير الـFollowers بتوعك 
    سبب كمان إن استخدام تويتر أسهل من استخدام فيسبوك بمراحل، خصوصا لأي شخص عادي أو شخصية مشهورة
     ملهاش لزمة فى الوجود 
    مجرد إنك تفتح الأبلكيشن و تدوس على الريشة و تكتب أي كلام ملوش لزمة و تدوس Tweet
    و تلاقى الناس بتعمل Retweet بالهبل 
    -
    أحد الأسباب برضو إن على تويتر أي حد ممكن يشوف تويتاتك و كومنتاتك و حبشتكناتك و يعملها Retweet؛
    و بالتالى بتبقى الدنيا والعة معاك و التفاعل نار 
    -
    على تويتر سهل جدا إنك تعمل كومنت على تويتة لحد و يرد عليك لأنه بيوصله Notification بكل كومنت على التويتة بتاعته؛ و دا على عكس الفيسبوك اللى بتلاقى على البوست الواحد كام ألف كومنت فبتحتار ترد على مين ولا مين
     و تتخنق فتروح قافل و قايم تشوف حاجة تاكلها 
    -
    اعتماد وسائل الإعلام و الصحف على تويتات المشاهير بيكون أكتر من اعتمادهم على بوستات الفيس؛
    و دا بسبب إن التويتة مش ممكن تعدل فيها حاجة.. يعنى اللى كتبته بيفضل لازق فى جتتك لغاية ما تمسحه 
    -
    كل الكومنتات أو الحاجات اللى بتعملها على تويتر بتكون ظاهرة على الـWall بتاعك؛ و دا ليه كذا نتيجة
    - أولهم هو إن الموضوع دا بيتماشى مع حب الظهور اللى موجود عند معظم الناس المشاهير؛ و بالتالى بيحب الناس
     تشوف آراؤه و تعليقاته على أي حاجة، بالإضافة لإنه بيعوز إن الناس تشوفه متواضع و بيرد على الناس و اجتماعي و كدة 
    - نتيجة تانية هى إن الناس اللى بتشتم بعض على تويتر أقل من الفيسبوك بكتير؛
     لأن أي كومنت بيكتبه بيظهر على بروفايله و يفضحه 

    توثيق حسابات تويتر أسهل نسبيا من توثيق حسابات Facebook؛ و بالتالى بيدى للناس دى قدر من البريستيج شوية 
    -
    فيسبوك مليان حسابات وهمية مزورة لفنانين و مشاهير و سياسيين بالهبل؛ و مع صعوبة إنك تعمل Verification للأكاونت بتاعك و عدد الناس الكبير جدا اللى بيحبوا الشهرة حتى لو على قفا غيرهم، بقى صعب تفرق بين الأصلي و المضروب 
    -
    سبب كمان بيرتبط بوصول المحتوى للمتابعين بتوعك.. 
    على الفيسبوك لو انت صفحة كبيرة هتلاقى إن وصول البوستات و الصور بتاعتك للناس لا يتخطى 10% من المتابعين بتوعك، و علشان تزود الرقم دا لازم تدفع فلوس للواد ابن زوكربيرج و تعمل إعلانات ممولة علشان مجرد
     إنك تزود فرصة ظهور البوست عند الناس
    على تويتر الدنيا حلوة و أي حاجة بتكتبها بتوصل للمتابعين على طول و مفيش مشاكل 
    -
    سبب كمان هو إن تويتر اتعمل كموقع للمتابعين، على عكس فيسبوك اللى اتعمل علشان التعارف و التواصل بين الأصدقاء؛
     بحيث يكون نسخة نضيفة شوية من منتديات أبو نواف 
    و بالتالى تويتر بقى مناسب للمشاهير أكتر لأنه بيستخدم الحاجة فى الغرض المخصصة ليه،
    على عكس فيسبوك اللى عمل موضوع الـFollowers و الصفحات دى بعد إطلاقه بفترة كبيرة 
    -

    غير كدة كمان إن الصحفيين بيعتمدوا على تويتر فى نشر المعلومات و الأخبار و المقالات بتاعتهم
     (بما إن الريتش فيه حلو و ببلاش) 
    كمان بيعتمدوا على تصريحات الصحفيين و السياسيين و المشاهير على تويتر؛ لأن زي ما قلتلك مينفعش تعدل التويتة؛
     و بالتالى بقى تويتر مصدر للأخبار
    بما إن تويتر بقى مصدر للأخبار؛ إذن أخبار المشاهير و تصريحاتهم لو كتبوها على تويتر هتوصل أسرع لوسائل الإعلام
    يعنى الموضوع عامل زي البيضة و الفرخة دول موجودين علشان دول موجودين،

    فى رأي كمان بيقول إن حاجز الـ140 حرف بتوع تويتر بيخلوا الناس "Less talkative"، أو بيخليهم يفكروا للحظة 
    فى الكلام اللى بيكتبوه علشان ميعدوش الرقم دا؛ و بالتالى بيبان اللى بيكتب إنه عميق و غامض،
     و الناس بتحب كدة، و المشاهير بيحبوا يبانوا كدة 

    كمان حاجز 140 حرف دا بيخلى التويتات كلها بنفس الطول تقريبا؛ و دا معناه إن فرصة انتشار البوست و تفاعل الناس معاه بتكون عاى حسب المحتوى مش على حسب الطول؛ و بيقضى على حتة المتابع الكسول اللى زي حضرتك اللى مبيقرأش البوست لو شاف كلمة "See more..." 
    ---
    دا غير إن بعض مستخدمى تويتر.. أو خلينا نقول نسبة كبيرة منهم 
    عندهم اعتقاد إن الناس اللى بيستخدموا تويتر
     أكثر نضجا من اللى بيستخدموا Facebook
    بصراحة لو عاوز رأيى أنا يعنى ممكن أقولك إن فيسبوك بقى فى متناول الجميع، و دا ميزة و عيب فى نفس الوقت 
    ميزة لأنه بيديك فرص للتواصل مع ناس أكتر من ثقافات و أيدولوجيات مختلفة 
    العيب بقى هو إنك بتضطر تحتك
     بناس ممكن يكونوا مش بنفس مستواك الثقافي ولا الأخلاقي (ممكن أحسن و ممكن أوحش).. لا هما غالبا أوحش 
    -

    فى رأيك انت بقى.. هل شايف الأسباب دى كافية لإنهم ميستخدموش الفيسبوك؟

    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    1. انت اول موقع عربي لمستخدمي اللاندرويد مش سامع حتى اسمك #-:

      ردحذف
    2. بصراحه بصراحه انا موافقك ع الكلام دا

      ردحذف

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×