مش كل موبايل بخطين زى بعض يعنى ايه ؟

مش كل موبايل بخطين زى بعض يعنى ايه ؟

    مش كل موبايل بخطين زى بعض يعنى ايه ؟

    بسم الله الرحمن الرحيم نبدأ :D

    معظم الموبايلات دلوقتى بقت بتشتغل بشريحتين.. عادي.. حاجة معروفة يعنى 
    بس اللى مش معروف 
    إن مش كل الموبايلات اللى بشريحتين زي بعض!!

    مش فاهم؟

    أفهمك !!


    موجود 3 أنواع من الموبايلات اللى بيشتغلوا بشريحتين:

    Dual Sim Switch

    Dual-Sim Standby (DSS)
    Dual SIM Active (DSA)

    كل نوع من دول بيختلف عن التانى فى طريقة العمل و تنظيم عمل الشريحتين




    نبدأ بالزبون الأول Dual Sim Switch

    و دا صعب تلاقيه فى الموبايلات الجديدة؛ لأن باختصار لو الموبايل بيشتغل بالتكنولوجيا دى مش هيتباع
    منه ولا حتة 
     فكرة عمل النوع دا هو إنك و انت بتشغل الموبايل بيقولك:
     
    صباح الإشطات و السكر النبات يا برنس  .. عاوزنا نستفتح بأنهى شريحة من الاتنين المرزوعين جوا دول؟
     
     و الشريحة اللى بتختارها هى اللى الموبايل بيشتغل بيها (الشريحة دى بس)، و التانية تقعد زي عُقب سيجارة فى طفاية بلاستيك قذرة محطوطة فى شقة واحد جايف راح يصَيِّف 
    باختصار مش شغالة ولا الموبايل يعنيه إذا كانت موجودة أصلا أو لأ.. مبتستقبلش ولا بتبعت مكالمات ولا رسايل ولا خدمات 3G ولا أي حاجة)
    - لنفترض إن الشيطان 
    غواك إنك تستخدم الشريحة التانية 
    .. عادى يعنى.. كل ابن آدم خطّاء

    هتعمل إيه؟ تروح عامل ريستارت للموبايل، و تستنى لما بصَبَّح عليك تانى و يقولك:
    "هتشتغل بأي شريحة من الاتنين دول؟" و تختار التانية
    - النظام دا كان موجود فى الموبايلات العتيقة اللى اتعملت أول ما كان الموبايل أبو شريحتين دا اختراع
    و حاليا تقدر تقول انقرضت و حل محلها النوع التانى...
    ---

    النوع التانى: Dual-SIM Standby
    - النوع دا هو الأكتر انتشارا دلوقتى، و فكرته بسيطة جدا:
    - الموبايل فيه Receiver (أو مستقبِل) واحد للشبكة و فيه مكان لشريحتين.. يقوم يعمل إيه؟
    - طول ما انت قاعد فى حالك و مبتعملش مكالمات ولا حاجة بيكون الشريحتين واصلين على نفس الريسيفر (الواحد)
     اللى اتكلمنا عليه، و بالتالى أي شريحة يجيلها مكالمة أو رسالة بيستقبلها الموبايل فورا
    - عيب النظام دا هو إنك لو بتعمل مكالمة من شريحة معينة، الريسيفر بيكون بتاع الشريحة دى حرفيا، و بيعامل الشريحة التانية معاملة الزوج اللى مراته متخانقة معاه بيقطع عنها مياه و نور 
    - لو حاولت تتصل بالشريحة التانية أثناء ما الشريحة الأولى بتعمل مكالمة (أو العكس) هيقولك إن الرقم غير متاح، أو مرفوع 
    ---

    النوع التالت و الأخير هو الـDual-SIM Active
    و دا غالبا بيكون مفهومك عن الشريحتين
    - فى النظام دا بيكون الموبايل فيه أكتر من مستقبل للإشارة بتاعة الشبكة، و بيربط كل شريحة على ريسيفر من دول
    - فى أي وقت من الأوقات بيقدروا الشريحتين إنهم يستقبلوا المكالمات و الرسايل و الكلام دا مع بعض فى وقت واحد
    - حتى لو انت بتعمل مكالمة على شريحة من الاتنين و حد اتصل بيك على الشريحة التانية؛ بتستقبل المكالمة دى على الـWaiting أثناء ما انت بتتكلم عادي جدا
    - عيب الموضوع دا هو إنه مستهلك للشحن بشكل غبي (لأن الموبايل بيكون على اتصال بشبكتين فى نفس الوقت)، كمان مكلف شوية بالنسبة للشركات؛ و بالتالى مبيبقاش موجود إلا فى الموبايلات الـFlagships اللى الواحد ممكن يبيع شراباته علشان يشتريها
    ---------------------

    فى أي موبايل من النوعين الأخيرين الموبايل بيخيرك بين الشريحتين بحيث واحدة تشتغل 3G و 4G
    (بالإضافة طبعا للمكالمات)، و دى بيبقى اسمها Master SIM
    و التانية بيكون متاح ليها بس خدمات الجيل التانى (2G) بحيث تكون على أد المكالمات و الرسايل و الكلام الخفيف دا،
    و بيكون اسمها Slave SIM

    الموضوع دا بيكون بغرض تنظيم مرور البيانات للموبايل حسب احتياجاتك انت و تفضيلك، و فى نفس الوقت تحديد الشريحة اللى ليها الأولوية فى استقبال الشبكة و كدة 
    أما فى موبايلات الـDual Active فأحيانا.. لأ أحيانا إيه؟ غالبا بيكون فيها مستقبلين للشبكة، واحد ابن ناس كدة بيستقبل الجيل التالت و الرابع، و واحد ابن الغسالة بيستقبل جيل تانى بس 
    و انت طبعا اللى بتحدد لكل شريحة هى هتشتغل إزاي و كدة 
    --

    احلى مسا عليكو و نتقابل فى شرح جديد <3

    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    مشاهدة التعليقات

    إرسال تعليق

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×