8107339487713063
recent
أخبار ساخنة

يعنى ايه Noise Cancellation الموجودة فى سماعات الهاند فرى

الخط

يعنى ايه Noise Cancellation الموجودة فى سماعات الهاند فرى


بسم الله الرحمن الرحيم

المصطلح سعيد الحظ اللى معانا النهاردة هو الـNoise Cancellation أو إزالة الضوضاء أو الضجيج 
و قبل ما نعرف إيه هى إزالة الضوضاء دى لازم نعرف يعنى إيه أصلا ضوضاء 
الضوضاء دى اللى هى الدوشة  أيوَن.

و هى عبارة عن مجموعة أصوات بتتضرب فى الخلاط و تقرفك فى عيشتك 
يعنى مثلا لو انت راكب أتوبيس أو المترو أو قَطر الصعيد و بتكلم واحد صاحبك فى الموبايل هتلاقى واحد بيزعق
 لابنه اللى وَقَّع القُفَّة، و واحدة بتحكى لصاحبتها على البت الرخمة اللى بصتلها باحتقار و الواد أَشَّف اللى
 مخاصمها من يومين  و هتلاقى واحد بيبيع مناديل و واحد بيبيع بقسماكط و واحد بيبيع الفَلَّاية اللى
 بتجيب القَمل دَكَر و نتاية 
-ودنك انت مبتقدرش تركز غير مع صوت واحد.. اللى هو الصوت اللى انت
 عاوز تسمعه طبعا (صوت صاحبك الفاشل اللى بتكلمه )

و باقى الأصوات دى بتسمعها على إنها حاجة مقرفة و خلاص بتخليك مش عارف تركز.
هى دى بالظبط الضوضاء 
--
آاااااه.. قصدك الدَّوشة؟ 
بالظااااااااابط.. هى الدوشة 
العلماء فضلوا يفكروا كتير فى حل للدوشة دى و توصلوا لموضوع الـNoise Cancellation.. أو خلينا نقول موضوعين الـNoise Cancellation 

الـNoise Cancellation دا نوعين:

--
الأول: Passive Noise Cancellation:

و دى فكرتها لذيذة و سهلة جدا 
انت لما بتبقى فى مكان فيه هيصة و دوشة و مش عاوز تسمع اللى حواليك.. بتعمل إيه؟ لأ..
 غير إنك بتسب الدين 
بتحط إيديك على ودانك و تقفلها بيها 
هو دا بالظبط فكرة الـPassive Noise Cancellation

- انت مش عاوز تسمع الأصوات اللى برة.. خلاص.. أعملك سماعة تقفل ودانك و تفصلك عن الأصوات اللى برة
 و تخليك متسمعش غير الصوت اللى انت عاوزه 
- الموضوع بسيييييط.. و رخيييييييص 

- لذلك معظم السماعات بجميع أنواعها دلوقتى بتعتمد على إنها إما تملا "خُرم وِدنك" أو تغطيها كلها 

عيب الموضوع دا فى إنه بيخليك تسمع كل أصوات أجهزة جسمك اللى خلقها ربنا 

- جَرَّب كدة تحط الـHand Free فى ودانك و انت بتمضغ لبانة! - كمان ودانك مش المصدر الوحيد للصوت..
 الصوت بيتنقل خلال العضم 
يعنى لو انت قاعد فى أتوبيس من اللى "بينَعَّروا" هتسمع صوته مهما عملت لأنه بيتنقل خلال عضمك 
- كمان مش هتعرف تستفيد من الموضوع دا إلا من خلال السماعات بتاعتك.. و الموضوع دا برضو مقتصر عليك
 انت بس
 بمعنى إنك لو بتكلم حد هيسمع السّوِّيقَة اللى انت قاعد فيها برضو  
--

بعد كدة ظهر النوع التانى: Active Noise Cancellation

- فكرة الموضوع دا إن الأصوات اللى انت مش عاوز تسمعها هنستقبلها فى ميكروفون و نسمَّعهالك برضو 
متشتمش بس أنا عارف إن الفكرة غريبة.. لكن فكرة الـActive Noise Cancellation قريبة جدا من كدة 
- الموضوع دا بيعتمد على ظاهرة تداخل الأصوات و تلاشى الأصوات، و بيعتمد على إننا ناخد الدوشة
دى من ميكروفون و نعمل موجات تتداخل معاها بحيث إن التداخل دا يبقى تداخُل هدمي و يقضى على الدوشة دى 
-
طيب هو الجهاز اللى معايا هيعرف منين الطوشة من اللى مش دوشة؟

أنا أقولك 

العلماء لما عملوا دراسات لقوا إن اللى بيكيمك بيسمع الدوشة اللى حواليك زيه زيك بالظبط.. مسم..
هكذا هى الدوشة.

المهم إن دا معناه إن الهيصة دى بتدخل من الميكروفون اللى انت بتتكلم منه بيستقبل الأصوات المحيطة بيك
 زي ما بيستقبل صوتك بالظبط.

طيب إيه رأيك بفى لو عملنا ميكروفون فى الناحية التانية من الموبايل بحيث إنه يستقبل الدوشة و ميستقبلش صوتك؟
و بعد ما يستقبل الموجات الصوتية بتاعة عمك جابر اللى بيضرب الولا اللى كسر القُفَّة
و بتاع الفَلَّايات و الكلام دا يعمل موجات تتداخل معاها و تخليها كأنها مش موجودة؟ 

بعد ما يعمل موضوع الموجات دا يروح مطَلَّع الموجات دى فى سماعة الموبايل اللى انت بتسمع منها
و بتتبعت للحيوان اللى هيضَيَّع مستقبلك اللى انت بتكلمه 
و بالتالى إحساسك بالدوشة اللى حواليك و إحساس صاحبك اللى بتكلمه بيقل بشكل كبير 
--
مثال تانى للموضوع دا سماعات الـActive Noise Cancellation، و اللى فى الغالب بتكون غالية علشان الموضوع دا
السماعات دى بيكون فيها ميكروفونات فى الـEar Pieces بتاخد الدوشة اللى حواليك و بتعالجها و تطلعلها موجات تهدمها و تطلعها مع الصوت اللى انت بتسمعه؛ و بالتالى بتسمع الصوت نقي مهما كانت الهيصة أو الدوشة اللى حواليك
--
شركة Infinix Mobile عملت سماعة بتشتغل بالخاصية دى و سعرها فى الحونَيِّن 

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

نموذج الاتصال
الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×