مواقع اختصار الروابط بتشتغل ازاى ؟

مواقع اختصار الروابط بتشتغل ازاى ؟

    مواقع اختصار الروابط بتشتغل ازاى ؟


    بسم الله الرحمن الرحيم

    كتير جدا بنستخدم مواقع اختصار الروابط.. أيا كان السبب بقى 
    سواء كان علشان تشتغل "سِمسار لينكات" و تعمل مصلحة من كل واحد بيدخل على اللينك  ،
     و إما علشان اللينك الأصلي مبألظ و مش هينفع تستخدمه زي ما هو :
    - يا ترى إيه فكرة المواقع دى؟ و ازاى بتقدر تختصر أي لينك فى 3 أو 4 حروف؟! و ياترى الأرقام
     و الحروف الغريبة دى ليها معنى؟

    أنا أقولك 

    - لغة الآلة  اسمها Binary أو Base 2 لأنها بتتكون من رمزين بس؟ 
    - و الأرقام اللي بنستعملها النهاردة (من 0-9) إسمها Decimal أو Base 10 علشان بتتكون من 10 رموز مختلفة؟ 
    - لو لاحظت كمان ان أي نظام حسابي بيبدأ من اليمين للشمال، و القيمة بتزيد بمقدار عدد الرموز
    فى نظام الترقيم كل ما تعدى خانة. 

    المثال يا سيدى إن فى نظام الـBase 2 بتلاقى كل رقم ضعف اللى على يمينه
    مثال تانى فى ترقيمنا (Base 10)
     هتلاقى كل عدد أد اللي على يمينه 10 مرات (آحاد، عشرات، مئات،.... ) 

    - المهم بقى يا ريس ان فى أنظمة ترقيم بالهبل مختلفة فى عدد الرموز (أو الـDigits)،
    و بحسب عدد الرموز المختلفة هنحط رقم Base و نشتغل 

    - يعنى لو انت صاحى من النوم فريش و قمت خدت اللاتيه بتاعك و لقيت نفسك فاضى..
    تروح عامل نظام جديد و مسميه Base أي حاجة 
    و من أشهر أنظمة الترقيم Base 8 (من 0 لـ7) و الباقى مخدناهوش فى الكيلاس  و Base 12
     (اللي بيتكون من الأرقام من 0-9 و معاهم A و B) 

    - الناس اللي ابتدعوا موضوع تقصير الروابط دول صحوا برضو خدوا اللاتيه و فكروا فى فكرة عظيمة 
    - الفكرة دى إنهم قالك يا جماعة احنا عندنا كام رقم؟ 10
    و كام حرف لاتيني؟ 26 (عدهم حتى) 

    خلاص نعمل نظام نلم فيه الأرقام و الحروف دى و نسميه Base 36

    طلع واحد شيطان من وسطهم و قالك ان قيم الحروف الصغيرة (Lowercase) أو Small يعنى..
     مختلفة عن قيم الحروف الكبيرة (Uppercase)، طيب ما نستخدم دول و دول 
    تانى.. عدد الأرقام كام؟ 10
    الحروف الكابيتال؟ 26
    الحروف الصغيرة؟ زيهم و الله.. 26 
    يبقى عندنا كدة كام Digit؟ 62 
    يعنى احنا ممكن نعبر عن قيم لغاية 62 بـDigit واحد 
    يعنى كل رقم زيادة أكتر من اللي قبله 62 مرة 
    يعنى ممكن تعبر عن أكتر من 14 مليون (14,000,000) قيمة بـ4 رموز بس.. تخيل؟
     بدل 7 رموز تعبر عنه بـ4 بس  و له فى خلقه شئون 
    ---
    بعد كدة قالك كل واحد يرفع لينك علشان يختصره هياخد رقم؛ و الرقم دا هنمثله بالنظام العجيب دا
    و نديله لينك مختصر يتفشخر بيه و نكسب من وراه 
    ---
    - طيب انت تعرف ان الفيس أو تويتر أو يوتيوب أو أي موقع بيسمح لك تغير الـURL بتاع صفحتك الرئيسية
    بيتعامل معاها على إنها رقم ممثل بالطريقة دى؟ 
    - طيب انت تعرف إن الفيسبوك بيتعامل لسة مع البوستات و الصور و الجروبات و الصفحات الجديدة
     بنظام Base 10 إلى أن يثبت العكس؟ 
    لذلك لينكات البوستات بتلاقيها طويلة و جايبة لآخر الشارع 
    --
    - أنظمة الترقيم كتير جدا و متنوعة، و حديثا تخطت حاجز الـ10 رموز و بقى إسمها Alpha-numeric
    - عالم الإنترنت إسمه "العالم الرقمي" مش العالم النصي لأنه بيتعامل مع أي حاجة على إنها أرقام ليها قيم (حتى الحروف)
    - فكرة بسيطة زي أنظمة الترقيم الجديدة خلت ناس تكسب ملايين..شغل_مخك 
    --
    و لسة فى حاجة اسمها Positional Notation أو القيمة المكانية للرمز
    على سبيل المثال: القيمة المكانية للرقم 4 فى عدد 46 أد القيمة المكانية للرقم 6 بمقدار كام؟
    طبعا انت بديهيا كدة قلت بما إن العدد دا 46 إذن القيمة المكانية للرقم 4 هتساوى 40
    و دى أكبر خدعة عملها الشيطان فيك 
    أنا مش لسة كاتبلك بكيبوردى اللى هياكله الدود دا.. بس الدود مبياكلش كيبوردات 
    ما علينا.. أنا قلتلك إن فى أنظمة ترقيم بالهبل 

    و كل واحد ليه Positional Notation لكل رقم بتختلف من نظام للتانى.. صح؟ 
    طيب إيه رأيك بقى إن لو نظام الترقيم اللى بنستخدمه دا Base 8 هتكون قيمة الـ4 فى العدد دا 32؟ 

    أنا مش لسة قايلك فوق إن نظام Base 62 بتاع اختصار الروابط فيه كل رقم أكبر من اللى قبله بـ62 مرة؟ 
    طيب.. يبقى الـPositional Notation لأي رمز هيساوى عدد الرموز فى نظام الحساب المستخذم
     فى قيمة الرمز نفسه فى نظام الترقيم

    يعنى مثلا:

    لو هنتكلم عن نظام Base 62 هتلاقى إن الرقم 10 مثلا قيمته مبتساويش 10  و إنما بتساوى 62 

    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    مشاهدة التعليقات

    إرسال تعليق

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×