تطبيقات توفير الشحن بتعمل حاجة ولا كلام فاضى ؟

تطبيقات توفير الشحن بتعمل حاجة ولا كلام فاضى ؟

    تطبيقات توفير الشحن بتعمل حاجة ولا كلام فاضى ؟



    بسم الله الرحمن الرحيم

    ناس كتير أول ما تشترى موبايل أو تابلت؛ أول حاجة يعملها هى إنه يحمل تطبيقات لزيادة عمر البطارية،
     و تطبيقين تلاتة Anti-Virus و عشرين تلاتين لعبة و يقولك الموبايل بطىء 
     دا انت تحمد ربنا ان
     مجالوش فشل كلوي 
    كمان ناس كتير بتسألنا على برامج لتطويل عمر البطارية 
    ------

    سؤالنا بقى النهاردة.. هل أنا فعلا محتاج تطبيق يزود عمر البطارية
    و يا ترى التطبيقات دى بتعمل إيه بالظبط؟
    و يا ترى فى منها ضرر؟
    -----

    بص يا سيدى.. فى البداية كدة فى قاعدة احنا ماشيين عليها، و هى إن أى تطبيق بيعمل حاجة انا ممكن
     اعملها بسهولة يبقى الله الغني عن خلقته  ، بمعنى:

    أى تطبيق مهما كانت مساحته صغيرة فهو بيستهلك من أداء البطارية و الرام و البروسيسور...
     مهما كان الاستهلاك دا ضعيف فهو إسمه استهلاك و بيأثر على الأداء
    مثال على كدة إنى أجيب تطبيق بس علشان يقفل التطبيقات اللى مفتوحة مثلا!! أو يقفل الوايفاى لما
     ببقى مش محتاجه!! طيب و انا أكتع؟  عاجز انا يعنى و معرفش أقفلهم؟ 
    ------------

    نيجى لنقطة التطبيقات دى بتعمل إيه:

    - لو لاحظنا هنلاقى ان معظم التطبيقات دى مش محتاجة روت .. يعنى مبتتحكمش تحكم كامل قى الجهاز؛ كمان
     صلاحياتها بتقتصر على التحكم فى الشاشة، و قفل التطبيقات أو الوايفاي أو الموبايل داتا أو الـGPS ،
    أو تغيير وضعية التنبيهات
     من هنا نقدر نقول ان كل الحاجات اللى التطبيقات دى بتعملها.. من تقليل
    سطوع الشاشة لإنها تخلى الموبايل صامت أو تقفل الوايفاى و الـGPS أو تقفل الكام تطبيق اللى شغالين فى الخلفية..
    تفاهة السنين يا أخى و الله و كلها حاجات بسيطة و ممكن المستخدم يعملها بنفسه طالما مش
     أكتع يعنى 
     كمان نقدر نقول ان تقليل استهلاك البطارية عن طريق التطبيقات دى مبيبقاش تقليل استهلاك
    حقيقي (على مستوى الجهاز ككل) زي مثلا تقليل ترددات البروسيسور أو قوة معالج الرسوم أو تقليل معدل
     البحث عن شبكات Wi-Fi أو تقليل دقة اكتشاف الشبكة، و دا لأن الحاجات دى بتشتغل من غير روت غالبا؛
    و بالتالى السيستم بيديها الشاشة و الوايفاى و الحاجات دى تفتحهم و تقفلهم و تلعب فيهم علشان تحسسك
    إنها بتعمل حاجة
     جدير بالذكر ان تقليل الاستهلاك الحقيقي بيتم عن طريق Kernel معدلة أو إن الفيرموير (نسخة الأندرويد) اللى انت بتستخدمه يكون بيدعم كدة.. غير كدة تبقى بتشتغل نفسك بصراحة 

    --------------

    - أما عن الضرر الناتج عن التطبيقات دى فبيكون متمثل فى إنها نفسها بتسحب من البطارية باستمرار
    (جبتك يا عبد المعين تعيننى لقيتك يا عبد المعين عاوز حد يوديك الحمام) كمان كونها بتشتغل فى الخلفية على طول
     بيخليها تأثر على الأداء العام بشكل سلبي لأنها بتاخد من مساحة الرام و بتستهلك من البروسيسور
    بشكل مستمر
     كمان معظم التطبيقات دى بتبقى مجانية... الأمر اللى بيأدى لظهور إعلانات مزعجة باستمرار،
    و اللى بيأثر على تجربة المستخدم بوجه عام و بيخليه يتخنق من الموبايل و يبقى عاوز يحدفه من الشباك 

    ----------------

    الخلاصة:

    تطبيقات زيادة عمر البطارية زي عدمها طالما انت مش أكتع و ممكن تعمل اللى هى بتعمله بسهولة ؛
     بل إن عدمها أحيانا بيكون احسن 

    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    مشاهدة التعليقات

    إرسال تعليق

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×