-->
U3F1ZWV6ZTEwOTc2NjM5NDkwX0FjdGl2YXRpb24xMjQzNTAxODM2NjQ=
recent
أخبار ساخنة

تعرف علي مميزات مستخبية فى واجهة اجهزة Samsung

تعرف علي مميزات مستخبية فى واجهة اجهزة Samsung 



بسم الله الرحمن الرحيم

كتير مننا مسك موبايل سامسونج من اللي بيكحو تراب دول.. وفي الغالب كان Galaxy Star ومش عارف إيه
السبب لغاية دلوقتي! 
بس خلينا متفقين إن فيه إجماع إن واجهة سامسونج كانت تقيلة جدا علي الجهاز وكان بيهنج أكتر من ما الواحد بيستحمي 
بس لو طلعت لأي جهاز تم إصدارُه من بعد النوت 4 (في تاريخ الإصدار يعني مش لازم تكون ماسك جهاز أقوي منه )
 بتلاقي الواجهة أتحسنت كتير عن الأول وفيها مميزات كتير 
بس اللي لاحظته إن مش كل الناس عارفة المميزات دي أو بتكَسِل تستعملها 
البوست دا كنت عاوز أكتبه من ساعة ما بدأت في الكتابة أصلا
------

- الميزة الاولي:

وهي أنك بدل ما تستعمل البصمة أو تحط كلمة سر أو نمط.. إلخ .. ممكن تستعمل مجموعة من الاتجاهات علي الشاشة بحد أقصي 8 
وممكن توصلها من خلال :
Settings >
Accessibility >
Direction Lock
وبتفعلها من فوق عادي 
-----

- الميزة التانية:

الميزة اللي بعدها (وفي الغالب هيا قديمة بس لاحظت إن فيه ناس لحد النهاردة متعرفهاش )
عارف أنتا الشريط التنبؤي اللي بيبقي فوق الكيبورد دا؟! 
متعرفهوش؟! مش مشكلة إحنا مش عاوزينه فـ هعرفك حاجة تانية 
في ناس بتبقي عندها جملة مثلا أو كلمة بتكتبها كتير..
زي مثلا وأنا قاعد بكتب البوست دا كل شوية حد يكلمني وأقول له: "اتقل حبة تزيد المحبة " فـ بدل ما أكتب الكلام ده كلمة كلمة، فيه ميزة في الكيبورد وهيا إنك تعين أختصارات للكلمات..
مثلاً لمّا تكتب حرف كذا يجيب لك الجملة اللي أنتا محددهاله 
ومش شرط جملة دا أنتا ممكن تحط مقال كامل علشان مفيش حد معين للحروف
  (هتظهرلك في الشريط التنبؤي اللي قولنا عليه)
بتوصلها من خلال 
Settings >
Language and input >
Samsung keyboard >
Text shortcuts
وتظبط كل اللي أنتا عاوزه 
أنا عن نفسي مختصر الهاشتاجات اللي بنستعملها في المدونة و كلمة "بريد" للبريد الإلكتروني بتاعي وهكذا 
-----

- الميزة التالتة:

ودي تقريبا عامليها علشان البرامج السخيفة اللي بتقعد تجيببك إعلانات في الإشعارات..
ياخي تحس إنهُم كمان شوية هيحطوا لنا الإعلانات في هدومنا 
والميزة اللي بعد كدا بتخليك تقدر توقف الإشعارات عن أي تطبيق أنتا مش عاوز تشوف إشعاراته
 (وممكن تحدده كـ أولوية لو أنتا بتستعمل وضع عدم الإزعاج وعاوز تشوف إشعارات البرنامج دا )
ممكن توصلها من خلال:
Settings > Sound and notifications > App notifications 
معا لمحاربة الإعلانات 
-----

- الميزة الرابعة:

وهيا القفل الذكي (ذكي إزاي ولامؤخذة! وهوا هيسألني علي حاجات شخصية بحكم ان هو عايش معايا مثلا ؟! )
لاء ياسيدي! دا بيخلي موبايلك منغير باسورد خالص لما تكون موصله بجهاز بلوتوث معين سواء سماعة أو ساعة.. إلخ
او ممكن تحدد المنطقة بتاعة البيت نفسها علي الـ GPS بحيث أنه أول ما تدخل البيت يتعامل كأنه مفيش باسورد 
(طبعا مش محتاج أقول لك لازم تفتح الـ GPS أنت المفروض كبرت وعارف كدا لوحدك )
وممكن لو أنتا ماسكه يفضل منغير باسورد أنما لمّا تحطه ع المكتب جنبك أو بعيد عن جسمك عموما يرجع بباسورد تاني 
وآخر حاجة الصوت (بس منصحكش بيه علشان ناس الموبايل بتاعها بيبقي مش علوضعه خالص ف الحوار دا )
تيجي تقول له افتح ياض .. يقول لك لاء هات لي أمارة الأول! 
المعاملة بقت ناشفة أوي مع الموبايلات اليومين دول 
ممكن توصلها من خلال:
Settings > Lock screen and security > Secure lock settings > Smart lock

وعيش حياتك انت بقي (وأبقي قول لي قال لك إيه لمّا جيت تجرب حوار القفل بالصوت) 
-----
انا بئول انت تروح تجيب شوية لب و 2 حاجة ساقعة وتيجي علشان لسة خير ربنا كتير..


- الميزة الخامسة:

وهيا تثبيت الإطارات.. إيه يا عم تثبت الإطارات دا؟!
أنا أقولك!
تثبيت الإطارات دا حل لمشاكل كتير.. ونعمة الواحد يحمد ربنا عليها 
هديك مثال وانت هتفهم لوحدك 
مجاش عندكم ضيوف في مرّه وجِه عيل صغير مثلا مسك تليفونك وقالك شغلي لعبة يا عمو!
 (وهنا كانت عينا الصبي الصغير تلمعانِ بالبراء! ( وأمه كانت واقفه وشكلك هيبقي وحش لو مجيبتش للواد لعبة ! )
فـ أنت تتنازل وتديله الموبايل يلعب Subway شوية..

وهوب تلاقي الواد بيقلّب في الموبايل كأنه مكتوب بأسمه في الشهر العقاري وينتهك خصوصيتك !  
فـ علشان تتجنب الحوار دا من أوله هتعمل حاجة بسيطة خالص وهيا الآتي:
تدخل علي الـ Settings >
Lock screen and security > Other security settings > Pin windows >

وبعدها تفتح للواد الصغير اللعبة وتدوس علي زرار الـ recent وهتلاقي علامة دبوس مكتب عند اللعبة من تحت ع اليمين 
تدوس عليها وتديله الموب وأنتا متطمَن أنه مش هيعرف يخرج من اللعبة 

وعلشان تخرج انتا بقي فـ بتدوس علي زرار الـback والـrecent في نفس الوقت وهيخرَجك برا ويقول لك عاوز الباسورد بتاع الموبايل علشان يلغي تثبيت التطبيق !  (وفي بعض الاجهزة بيفتح علي طول)
-----

- الميزة السادسة:

الميزة دي للناس اللي ممكن مياخدوش بالهم من الإشعارات..
فـ مثلا أنا جالي إشعار الساعة 9:22 ممكن أخلي الموبايل يجيبهولي بعدين ويتهز تاني كأن الإشعار لسّه جاي
 بس بعد فترة انا اللي بحددها -علي سبيل المثال 5 دقايق.. فـ يهتز عند9:27- 
ودي بتوصل لها من خلال:
Settings > Accessibility > Notification reminder

لو ملقيتهاش الـ Notification reminder دي أدخل 
علي Dexterity and interaction وهتلاقيها جواها 
-----

- الميزة السابعة:

وهي أنك تقدر تفتح موبايلك من غير ما تلمسُه عن طريق أنك تحرك إيدك قدام الشاشة  وغالبا دي في الـ S6 وما فوق 
ودي بتوصل لها من خلال:
Settings > Accessibility > Dexterity and interaction
وتختار تنشيط بـ إيماءة/Gesture 
-----

- الميزة الثامنة :

وهي الـ Assistant menu 
ودي عبارة عن كورة صغيرة كدا أصغر من بتاعة الماسنجر لما بتدوس عليها بتظهرلك مجموعة من الاوامر (هتلاقيهم في الكومنتات تحت)
أهمهم زراير الـ home والـ back والـ recent (علشان الناس اللي بيقولو يعني عاوزين يحافظو عليهم )
بتظهر لك الأوامر اللي أنتا محددها قبل كده وتدس عليها فتتنفذ
ودي بوصلها من خلال:
Settings > Accessibility > Dexterity and interaction > Assistant menu
-----

- الميزة التاسعة:

الميزة دي بتسمحلك أنك توقف التاتش عن أجزاء معينة في الشاشة أو الشاشة بالكامل..
بحيث إنك لو هتوَري صاحبك صورة ومش عاوزه يقعد يقلب في الباقي أو لو أنتا بتلعب بتدوس علي زرار بالغلط
 ف عاوز توقَفُه أو أي أستخدام ليك بقي ! 
ودي بتوصلها من خلال :
Settings > Accessibility > Dexterity and interaction > Interaction control

ولمّا بتفعلها علشان تشتغل بتدوس علي الزرار اللي بيوطي الصوت وزرار الـ home
(كأنك بتاخد سكرين شوت بس بالصوت بدل الباور )
وعلشان توقفها هتلاقي عندك كذا خيار بتحدد اللي يناسبك منهم 
-----

- الميزة العاشرة:

معروف أنه من الصحي لجهازك انك تعمل لُه restart كل فترة وفترة..
بس طبعا محدش فاضي أصلا علشان يعمل كدا وممكن متفتكرش وفي كذا سبب يمنعك من أنك تعمل كدا..
فـ فيه عندك ميزة إعادة التشغيل التلقائية ودي بتعمل restart للموبايل في أي وقت أنتا بتحدده..
مثلاً انا عاملها علي الساعة 3 الفجر في يوم الأحد  (ومتسألش لية الأحد هي جَت كدا )
علشان أنا مثلاً بصحي 6 الصبح وبنام 11 بالليل، فـ دا معاد مناسب جداً ليا..
والحلو بردو انه مبيعملش الrestart لو انت ماسك الجهاز بتستخدمه أو البطارية أقل من 30% 
ودي بتوصل لها من خلال:
Settings > Backup and reset > Auto restart
-----

- الميزة الـ 11:
 
الميزة دي تعتبر قديمة شوية بس لسة شايف إنها من أهم المميزات.. وهيا التحكم في الجهاز بإيد واحدة..
بحيث إن لو موبايلك شاشتُه كبيرة فـ بتخليه يصغرلك الشاشة لحد نص الموبايل بس.. فتتحكم فيه بكل سهولة ب ايد واحدة 
والحلو ف الموضوع انه بيحطلك اختصارات لكل زراير الموبايل زي الصوت اوالزراير اللي تحت (في بعض الناس مش هيظهرلها الزراير)
وطبعا علي عكس أجهزة Apple لما بتعمل الحوار دا وتدوس علي أي زرار بيشتغل عادي جداً والطريقة الوحيدة علشان تكبرها هيا إك تدوس Return to full screen 
انما آبل أول ما بتدوس علي الـ Home بيكبرها تاني 
ودي بتوصل لها من خلال :
Settings > Screen > One handed operation
-----

- الميزة الـ 12
 
الميزة دي في الكاميرا 
وهي انك لما تدخل في وضع الـ Pro mode ممكن تخلي الصور اللي تصورها تطلع بصيغة Raw والصيغة
 دي بتخليك تقدر تغير وتعدّل الألوان بتاعة الصورة ببرامج التعديل زي الفوتوشوب وغيره 
ودي بتوصلها عن طريق إنك تفتح الكاميرا وتدخل علي الـ Pro mode
وتدوس ع الترس اللي فوق دا وتختار Save as raw 
-----

الميزة الـ 13:

ودي غالبا في الـS7 والـNote 5 علشان لو حد لقاها مش عنده 
وهي أنك لما تاخد سكرين شوت هتلاقي تحت زرار "إلتقاط المزيد"
ودا بيخليك تاخد سكرين شوت طويل زي أنك تعمل سكرين شوت 3 متر للبوستات بتاعتنا مثلاً 

وممكن تاخد انت Screenshots كتير وتلزقها في بعض بأي برنامج..
لكن اللي بستخدمه بصفة شخصية هو Screenshot join
ودا الرابط بتاعه:

-----


- الميزة الـ 14 : 

- وهيا أنك تقدر ترد علي المكالمات من زرار الهوم وتقفل المكالمة من زرار الباور 
الموضوع دا عن نفسي مبستغناش عنه وبستخدمه 
ودي بتوصلها من خلال :
Settings > Accessibility > Answering and ending calls
وبتفعل الأتنين أو واحد لوحده لو حابب 
-----


- الميزة الـ 15 : 

- ودي خاصة بالـ Always on display في الـS7 والنوت 7 الله يرحمه 
ودي بتمكنك من تعديل الحاجات اللي بتظهر في الشاشة في وضعية الـ AOD (اسكت مش هما بيختصروها كدا !! )
بتوصلها من خلال :
Settings > Display > Always on display
أول حاجة أنماط الساعة..
واللي بتديلك 3 خيارات لشكل الساعة.. بس الحلو في الموضوع أنك ممكن تنزل أنماط تانية من علي الـ Theme store ..وتدخل علي الـ Always on display وتعيش بقي 
-----

- الميزة الـ 16:

هيا مش ميزة واحدة ! هُمَّا ميزتين للـS7 وهما خاصين بالكاميرا كمان 
الميزة الأولي وهيا أنك لما تفتح الكاميرا وتدخل علي الأوضاع هتلاقي عندك في الشاشة مكتوب More من فوق كدا..
ومنها إضافة الأختصار إلي الشاشة الرئيسية..
ودا بيمكنك من أنك تضيف أختصار مثلا للـ Pro mode علي الشاشة الرئيسية بشكل مباشر
 بدل ما تدخل ع الكاميرا وبعدها تفتحه 

- الميزة التانية وهيا في وضع تصوير الـ Panorama.. بالإضافة لأنُه بيصوّر صورة عريضة بيصور حاجة زي فيديو،
 فـ لما تعرضها ممكن تشوف الناس في الصورة بتتحرك مش تلاقي تيشيرت واحد في حتة
والناحية التانية دراع واحد والتالتة لامؤخذة ودن واحد
---


- الميزة الـ 18 : 

ودي كمان للـ S7 معلش يا جماعة flagship ولازم نديله حقه لميزة دي خاصة بوصلة الـ OTG اللي بتيجي مع الجهاز واللي بتمكنك من استخدام فتحة الـ Micro USB كـ منفذ USB كامل  سواء هتشغّل فلاشة علي الموبايل أو ماوس أو كيبورد أو هارد خارجي أو أي شئ آخر.. الجديد في الموضوع بقي أنك لوحطيت كابل USB عادي زي اللي بتشحن بيه الموبايل
 في الـ S7 ووصلته في جهاز سامسونج تاني هتلاحظ أنه بيتشحن وظهرلك علي شاشة الـS7 بعض الخيارات..
من ضمنها أنك تظهر كل ملفاتك اللي علي الجهاز التاني عندك علي الـS7
(طبعا لازم توافق من الجهاز التاني علي قراءة الملفات دي )
-----

يارب يكون الموضوع افادكم و متنساش تشترك فى النشرة البريدية اسفل الموضوع لمتابعه جديد المدونة

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×