8107339487713063
recent
أخبار ساخنة

يعنى ايه DDoS Attack ؟

الخط

يعنى ايه DDoS Attack ؟


بسم الله الرحمن الرحيم

بما إننا الوحيدين تقريبا اللى لسة متكلمناش عن هجمة DDoS الأخيرة دى، قررنا نكتب عن الـDDoS،
 و ربنا يستر 
كالعادة هبدأ معاك بمعنى DDoS.. هل دى شتيمة مثلا؟  

لا يا سيدى مش شتيمة.. DDoS دى اختصار لمصطلح Distributed Denial of Service 

= أترجمهالك بالعربي؟  

يعنى "هجمات متفرقة للحرمان من الخدمات" 
- عروستى برضو 
= خلينى أديك مثال بسيط أوضح لك بيه الموضوع 
عارف سيرفرات مواقع نتيجة الثانوية العامة؟ مفكرتش قبل كدة ليه أوقات كتير السيرفرات دى "بتقع"
بعد إعلان النتيجة بوقت قصير؟ 
برافو.. علشان الضغط الكبير اللى بيبقى على السيرفرات دى 
طيب.. لو لؤي ابن اختك سمعك و انت بتقول "السيرفر واقع"، و سألك: السيرفر دا وقع إزاى يا خالو؟ هتقوله إيه؟ 
= ممتاز.. إنك مبتعرفش توصل للنتيجة عليه .. بس ممكن نخلى كلامنا عميق شوية و طالع من الشمخ الجواني
 و نقول إنك مبتعرفش توصل "للبيانات" اللى انت عاوزها على السيرفر  
طيب.. انت كدة اخترقت سيرفرات النتيجة؟ 
- همممم.. لأ
= طيب انت خدت بيانات من السيرفر اللى مسئولين عنه مش عاوزينك توصلها؟ 
هو بغض النظر عن إن أي أم مصرية أصيلة مبيغمضلهاش عين إلا لما تجيب نتيجة مصر كلها علشان تذل بيها العيال ،
 إلا إن البيانات دى محطوطة أصلا على السيرفر علشان الناس توصلها، يعنى انت مش مستر روبوت
 لما تمسك أرقام الجلوس بالدور و تجيب نتيجتهم واحد واحد 
إذن انت مخترقتش حاجة ولا تعرف أصلا تخترق السيرفرات دى  
------

بس كدة.. إحنا تقريبا خلصنا  
لو عاوز تفسير الكلام اللى فوق دا و علاقته بموضوع الـDDoS خليك معايا  
مبدئيا: الـDDoS مبيفرقش كتير عن موضوع سيرفر النتيجة دا  
كل ما فى الموضوع هو إن اللى بيعمل الهجوم بتاعه على السيرفر بيطلب كميات بيانات كتيرة جدا من أجهزة كتيرة جدا
(سواء كمبيوتر أو موبايل) فى وقت واحد؛ و بالتالى بيعَلِّم على السيرفرات دى و بيحملها فوق طاقتها؛
و بالتالى بيوقَّع السيرفر و بيهنجه، و بيحرم المستخدمين (اللى هما أنا و انت) من الخدمات اللى الموقع دا بيقدمها،
 و كمان ممكن يأثر على قواعد البيانات اللى على السيرفر اللى حصل عليه الـDDOS Attack نظرا لإنه بيعمل
 الدنيئة معاه و بيتجاوز سرعات الكتابة و القراءة الخاصة بالسيرفر 

- يعنى ممكن أنا و أصحابى نجمع بعض كدة و نعمل DDoS Attack على موقع معين؟ 
= أنا مش بقولك موضوع مواقع النتيجة دا صورة مصغرة من الـDDoS؟ أينعم الناس بيتزاحموا على مواقع النتيجة بشكل عشوائي بدائي همجي جميل  و مفيش أي نوع من أنواع التنظيم، إلا إنهم بيعملوا نفس التأثير تقريبا 
بس بالنسبة للسيرفرات الكبيرة (التقيلة بمعنى أصحّ) الموضوع بيكون أصعب كتير من مجرد كام مليون
واحد كل واحد منهم بيدخل رقم جلوس و يدوس Enter 

علشان تخترق سيرفرات عملاقة زي بتاعة Facebook أو Twitter أو Google، هتحتاج مئات الآلاف
من الأجهزة القوية من حيث المواصفات، و لازم تكون متوصلة على النت باتصال فائق السرعة (مش TE Tata ) 
و هتحتاج كمان إنك تستهدف سيرفر بعينه (لو كان للسيرفر عين ) و تطلب منه طلبات كتيرة جدا،
 و تديله أوامر كتيرة جدا من كل الأجهزة اللى قلتلك عليها دى فى نفس الوقت (لوكشة واحدة )

طيب.. أنا ممكن أجيب أجهزة كمبيوتر بالهبل و سرعات نت كبيرة زي دى منين؟ 
اللى بيعملوا الموضوع ده غالبا بيستخدموا أجهزة كتير جدا، بس معظمها مش بتاعتهم.. سواء بقى موبايلات
أو كمبيوترات أو لابتوبات أو ترابيزات بلياردو و بنج 
طيب.. لو هو الكمبيوتر مش بتاعه.. ممكن يستخدمه إزاى؟ 

هو أنا مقلتلكش؟  مش معظم الأجهزة دى بتكون متفيرسة أو عليها Trojan؟ 

طيب الفيروسات دى ممكن تيجى منين؟ 
من كراكات الألعاب و البرامج و باتشات الويندوز اللى بتجيبها من على النت  .. أيوة.. أيوة.. زي اللى على جهازك كدة  
و فى أدلة كتير =بتثبت تورط الجماعة بتوع كراكات 3DM فى استغلال أجهزة الناس اللى حملوا
كراك GTA V فى عمليات مشابهة  مفيش حد صالح.. كله بتاع مصالح 

موضوع هجمات الـDDoS على الرغم من بساطة فكرته لدرجة إن أحد الهجمات كانت عبارة عن إن السيرفر ياخد
أوامر و كأن الواحد بيدوس Enter بس  ، إلا إنه مش بالبساطة اللى فى دماغك خالص 
لازم يكون اللى بيعمل الكلام دا فاهم و عارف هو بيعمل إيه كويس، و لازم يكون مأمن نفسه بأجهزة كتير
و يقدر يستمر فى الهجوم بتاعه لمدة طويلة، بحيث يقدر يبتَزّ الشركة صاحبة السبرفرات اللى عليها الهجوم
(و أنا آسف إنى بقول "يبتز" كدة فى وسط الكلام  )

--------------------------------- (خط طويل  )

طيب إيه الفرق بين الـDDoS و الـHacking؟

الـDDoS زي ما قلتلك بيكون عبارة عن رخامة لا أكثر ولا أقل 
بمعنى إنك عاوز حاجة من شركة معينة فبتضغط على سيرفراتها علشان تعملك الحاجة اللى انت عاوزها
 و تخف الضغط عن سيرفراتها.. زي العيل الصغير اللى بيقعد يزن لغاية ما تجيبله اللى هو عاوزه
أما الـHacking فبيكون إن الواد يدخل يفتح محفظة أبوه و ياخد اللى هو عاوزه 
الـHacker غالبا بيعتمد على التخفى، و بتعتبر عملية الاختراق ناجحة أكتر كل ما المخترق خد اللى هو عاوزه
و مشى من غير ما حد يتعرف عليه، أو حد ياخد باله إنه دخل و خرج أصلا 
(زي الحرامي اللى بيدخل ياخد حاجة و يخلع قبل ما حد يشوفه  )
---------

طيب.. هجمات الـDDoS الأخيرة دى مشهورة أوى كدة ليه؟

هقولك.. كل شهر بيحصل عمليات DDoS Attacks بالهبل و محدش بيسمع عنها؛
لأنها بتكون فى الغالب لسيرفرات تبع شركات مش مؤثرة أوي، أو بنوك أو خلافه
لكن الجديد هنا بقى إن الهجمات دى اتعملت من أجهزة كتير جدا فى نفس الوقت، و من أماكن مختلفة فى دول كتير جدا،
و بدأت باستهداف سيرفرات شركة DYN اللى بتقدم خدمات زي الـDNS (أو Domain Name Service)
لشركات عملاقة، زي Twitter و NetFlix و Spotify و Amazon و غيرهم، و دا أدى لتأثر
 خدمات الشركات دى فى أماكن كتير فى العالم.. ربك بيخلص و الله 
و مازالت الهجمات مستمرة لغاية كتابة البوست دا (اللى هو قبل ما انت تشوفه بساعات كتير يعنى  )
و الله أعلم الدنيا هترسى على إيه 

و بكدا يكون انتهى موضوعنا و ياريت تشترك فى نشرتنا البريدية لمتابعه كل جديد و شكرا 

ليست هناك تعليقات
إرسال تعليق

إرسال تعليق

تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ )) ‏

الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات

آرائكم تسعدنا، لمتابعة التعليق حتى نرد عليك فقط ضع إشارة على إعلامي

نموذج الاتصال
الاسمبريد إلكترونيرسالة

تم اكتشاف مانع الأعلانات

من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

×