باى باس كوماند ببجى موبايل Command Pubg Bypass بدون باند دخول سيرفر الموبايل

كل اللى محتاج تعرفه عن كاميرات الموبايل

بسم الله الرحمن الرحيم

فى مثل بيقول الكاميرا النضيفة تخلى الخدامة مضيفة  

و بما إن مفيش موبايل النهاردة مفيهوش كاميرا، إلا إن ما شاء الله مفيش كاميرتين بنفس الجودة خالص 

و على الرغم من إن معظم كاميرات الموبايلات اللى موجودة دلوقتى بين الـ8 و الـ13 ميجا بيكسل، إلا إنك بتلاقى كاميرات صورها كويسة جدا و كاميرات صورها تعبانة (وحشة يعنى.. دى استعارة مكنية  ) بل إنك بتلاقى كاميرات كتير جدا دقتها أقل و بتطلع صور أفضل من كاميرات أعلى فى عدد الـMegapexils 

و ممكن نضرب مثال بأيفون 6 اللى كاميرته 8 ميجا بيكسل و كانت بتنافس كاميرات كتير جدا و بتتفوق عليها..
 بل إنها اتعملت علشان تنافس كاميرا النوت 4، و اللى كانت من أفضل الكاميرات فى وقتها.. و تتغلب عليها

و تغلبت عليها؟

لا نافست بس 

بس نوصل من هنا لإن عدد الـPixels مش مقياس لجودة الصور إطلاقا برضو 

و علشان يبقى الكلام متستف و مترتب كويس هنبدأ من تحت الصفر بدورين

هنبدأ من أول معنى البيكسل أصلا.. أنا فاضى شوية معلش 

البيكسل دا يا سيدى حاجة صغيرة جدا.. جيددددا

و هو النقطة اللى بتاخد لون و بتكون الصورة (اللوجو بتاع البيدج دا مثلا مقاسه 3000 * 3000 بيكسل)
 9 مليون بيكسل يا مؤمن علشان نطلع صورة زي دى!  علشان تعرف احنا بنتعب ازاي 

البيكسلات دى بتكون الصورة عن طريق إن كل بيكسل بياخد لون، و بيكمل البيكسلات اللى حواليه علشان تطلع الصورة،
 و بما إن البيكسل دا صغير بشكل لا يتخيله بشر.. أو "بَشَغْ" استبدلوه بوحدة الميجا بيكسل ،
و البيكسلات دى بتكون فى السنسور (أو المستشعر) بتاع الكاميرا و بتلقط الضوء اللى بيدخل من العدسة
و بتترجمه لبيانات رقمية على حسب الصورة اللى انت بتصورها.. تاخد لِب؟  أصلنا مطولين شوية يعنى 

طبعا
 كل ما زاد عدد بيكسلات الصورة كل ما كانت الصورة فيها تفاصيل أكتر و كل ما كان حجمها أكبر على الميمورى،
 لكن الموضوع مش بالبساطة دى فى كل الحالات طبعا؛ يعنى لو انت عندك صورة متصورة بكاميرا 5 ميجا بيكسل
 ممكن تطبعها على ورقة A4 من غير ما تبكسل ولا تبان البيكسلات فى الطباعة (لو لاحظت إن الكاميرات
 فضلت فترة كبيرة 5 ميجا بيكسل، و معظم الكاميرات الأمامية بتاعة الموبايلات دلوقتى 5 ميجا)..
يلا معلومة كدة بنقدمها لشعب البيدج  (بصوت الست المشتشارة)، لكن الكاميرات اللى بدقة أكبر ظهرت
علشان تبين تفاصيل أكتر فى الصورة، و علشان معظم الصور اللى بتتصور دلوقتى بتكون محتاج إنك
 تقصها أو تعمل Zoom على جزء معين من الصورة، أو حتى تطبعها على ورق أكبر من A4،
 طبعا زمان أيام الأفلام الـNegative اللى ميعرفهاش جيل الأيباد  كانت الصورة بتتسجل على فيلم
عليه مواد متأينة ألوانها بتتغير بحسب اللون، و كانت بتتكون من نقط شبيهة بالبيكسلات كدة، و كل
ما كانت النقط دى أصغر كل ما كان أفضل.. مترميش القشر على الأرض احنا لسة منضفين 

---

فى عوامل كتير جدا بتتوقف عليها جودة الصور، منها عوامل مرتبطة بالسنسور نفسه، و عوامل مرتبطة بالعدسة، و عوامل مرتبطة بالسوفتوير و الهاردوير و حضرتك شخصيا  خلصت اللب؟  هات غيره.. احنا لسة قاعدين 

--

- هنبدأ بالعوامل المرتبطة بالسنسور، و أهمها:

1- دقة السنسور (عدد الـMegaPexils)..

لا ما احنا اتكلمنا فى النقطة دى فوق 

-

2- حجم البيكسل نفسه:

الصور الرقمية (Digital images) ملهاش أبعاد محددة بوحدات القياس اللى احنا بنستخدمها
 (المتر أو البوصة أو الكلام دا)، لذلك قاعدة إن كل ما كان البيكسل صغير كانت الصورة أفضل مبتنطبقش هنا؛
لكن على العكس.. كل ما كان حجم البيكسل فى السنسور أكبر كل ما ساعد على التقاط كمية ضوء أكبر،
و بالتالى بتكون الصور أفتح، و بتزيد قدرة الكاميرا على التصوير فى الإضاءة الضعيفة..
 (أكبر حجم بيكسل موجود حاليا فى كاميرا موبايل موجود فى موبايلات HTC M7 و M8 و HTC 10 من غير M  ،
 و حجمه 2 ميكرون.. لدرجة ان من كبر السنسور سموه UltraPixel، لكن طبعا ما كل ما يتمناه المرء يدركه و كدة
 و، و لأن السنسور بتاع الموبايل حجمه محدود جدا لو هتقارنه بكاميرات الـDSLR، فدا جه على
 حساب دقة الكاميرا، الحلو ميكملش يا جماعة 

لكن عندنا على سبيل المثال سامسونج جالاكسى S7 و هواوى نكسس 6P اشتغلوا على نفس الجزئية
بتاعة حجم البيكسل مع المحافظة على دقة صور زي الناس.. مش 4.3 ميجا زي الـM7 

-

3- الـISO:

- الآي إس أو (أو الأيزو زي ما ناس كتير بتسميه  ) حكايته حكاية..

- الـISO دا اختصار لمنظمة International Organization of Standardization
(أو المنظمة الدولية للمعايير).. لسبب ما سموه كدة  ، و دا بيقيس قدرة سنسور الكاميرا على إنه يلقط الصور
 فى الضلمة أو ظروف الإضاءة المنخفضة، بمعنى إن كل ما زاد أقصى ISO للكاميرا كل ما كانت أفضل
 فى التصوير فى الضلمة (من غير فلاش طبعا)

- و بما إن السنسور بتاع كاميرا الموبايل محدود جدا بالمقارنة بأي كاميرا DSLR، هتلاقى الصور اللى
 بتتصور بـISO عالى فيها شوية Noise ولاد كلب 

- بالإضافة لكدة.. لو انت عندك كاميرا أقصى مستوى للـISO فيها 800 على سبيل المثال، لو جيت تصور صورة
و تخلى الـISO بتاعها 800 تبقى كدة بتجيب آخر السنسور، و لو يعرف طريق المحكمة هيروح يشتكيك بعكس
 لو عندك كاميرا فيها أقصى مستوى للـISO على سبيل المثال 3200.. هتلاقى الـ800 دول لعب عيال بالنسباله 

-

4- التثبيت البصري للصورة:

- التثبيت البصري دا اسمه بالعنجليزي Optical Image Stabilization ، و اختصاره OIS، و دا يعتبر حاجة كويسة جدددددا (شوف انت عاوز دى بصوت مين بقى )، و وظيفته إنه يثبت الصور اللى بتلقطها لو إيدك اتهزت
 (هزة بسيطة طبعا) أثناء التصوير (لو تفتكر أول موبايل نزل بالخاصية دى كان LG G2، و كان الإعلان
 بتاعه واحد بيصور بفرخة "دجاجة يعنى" و كدة ) ؛ و على الرغم إنه مش موجود فى أجهزة كتير، إلا إن
 الموبايلات اللى بيكون موجود فيها بيفرق كتير فى تصويرها و بيعالج عيوب السواق 

و فى شركات كتير بتعوض الموضوع دا بإنها تحط إضافة فى تطبيق الكاميرا علشان يحاول يثبت الصور
من غير ما يكون الكاميرا فيها OIS

-

5- وجود HDR:

البتاع دا يا سيدى المفروض إنه اختصار لـHigh Dynamic Range 

و معناه باختصار إن الـISO و فتحة العدسة بيتأقلموا (حلوة يتأقلموا دى ).. أو بيظبطوا نفسهم على مستوى
 الإضاءة الموجود علشان يدوك صور أفضل من غير ما تستخدم الفلاش مثلا أو تظهر شوية الـNoise
 أولاد الكلب اللى قلتلك عنهم فوق 

ميكانيكية عمل البتاعة دى هى إنها بتلقط نفس الصورة كذا مرة فى وضعيات Exposure مختلفة،
و بتجمعهم و بتوصل فى الآخر لصورة نضيفة فيها كل التفاصيل اللى انت عاوزها

الميزة دى كويسة جدا فى تصوير الأماكن الضلمة، و بتديك إحساس بواقعية الصور و تخليها حاجة كدة على كيف كّيًّوفَك 

-----

نيجى بعد كدة للعوامل المرتبطة بالعدسة.. إوعى تزهق 

1- فتحة العدسة:

- فتحة العدسة اسمها Aperture، و كل ما فتحة العدسة كبرت كل ما كان أفضل؛ لأنها بتسمح بدخول
 كمية ضوء أكبر للسنسور، و بالتالى هتكون الصورة فاتحة أكتر و هتزيد كفاءة الكاميرا فى التصوير فى الضلمة..
 أنا زهقت من الجملة دى و معدتش كاتبها 

- فتحة العدسة بتتكتب فى صورة عملية قسمة ثابت (رمزه F) على رقم؛ لذلك بتلاقيهم يقولك كاميرا الـS7
بفتحة عدسة F/1.7 على سبيل المثال، و انت تبقى هتتجنن و تعرف ازاى تكون عدسة النوت 3
 على سبيل المثال F/2.2 و الـS7 بفتحة F/1.7!!

لكن فى الحقيقة التناسب بيكون عكسي بين فتحة العدسة و الرقم اللى تحت الـF؛ يعنى على سبيل المثال
 لو قلت ان فى عندنا عدستين، واحدة بفتحة F/4 و واحدة بفتحة F/2 هتلاقى إن العدسة اللى بفتحة F/2
هتدخل ضوء أكتر من F/4؛ لأن باختصار شديد نص F أكبر من ربع F 

غالباً بيبقى الموبايلات مكتوب عليها ان فتحة العدسة F2.2 أو F2.0 (قال يعنى صِيَّع و أشباح و كدة ) 

--

2- سرعة الغالق:

- سرعة الغالق أو الـShutter Speed من أهم الحاجات المرتبطة بالعدسة، و المهمة جدا فى أي كاميرا
تستخدمها عموما

- سرعة الغالق بتحكم فى حاجات كتير زي كمية الإضاءة اللى بتدخل للمستشعر، و سرعة التقاط الصورة
 عن طريق تحديد الفترة اللى بيتعرض فيها السنسور للضوء 

- سرعة الغالق دى بتتقاس بكسور من الثانية (1/10 أو 1/100 مثلا)، و ممكن توصل لغاية كذا ثانية أو
دقايق كمان (طبعا دا على حسب ما بتحدد انت) 

- خلينى كمان أقولك ان كل ما فتحة العدسة كبرت كل ما هتحتاج Shutter (أو غالق) أسرع..
 بالمنطق كدة علشان هيمشى مسافة أكبر 

- و سرعة الغالق دى بقى يا سيدى غالبا انت اللى بتتحكم فيها على حسب المشهد اللى انت هتصوره؛
على سبيل المثال لو هتصور مشهد رياضي مثلا زي جول تريكة فى الصفاقصي 2006، هتحتاج سرعة
غالق كبيرة جدا؛ علشان انت محتاج تلقط الصورة بأكبر سرعة ممكنة

أما لو هتصور فى إضاءة ضعيفة فهتحتاج سرعة غالق أقل نسبيا؛ و هتحتاج تثبت الموبايل أو الكاميرا اللى
معاك بقدر الإمكان، و يستحسن لو تستخدم Tripod فى الطلعة دي 

عارف الموبايلات اللى بتصور الرسم بالضوء زي هواوى P8؟ بتعمل كدة عن طريق زيادة
الـExposure (التعريض).. مش بتاع الأستاذ أحمد موسى لأ 

الـExposure دا المدة اللى السنسور
بيتعرض فيها للضوء، و طبعا بيتناسب عكسي مع سرعة الغالق و طردي مع فتحة العدسة 

---

زمانك دلوقتى بتقول كفااااااااية حراااااااام 

معلش.. هانت 

من العوامل اللى بتأثر بشكل كبير على الصورة التشيبست بتاع الموبايل و بما إن الكاميرا جزء من الهاردوير
 فلازم تتأثر بنوع و موديل التشيبست؛ على سبيل المثال تشيبست سنابدراجون بتقدم معالجة ممتازة للصور؛
على عكس حاجة زي بعض موديلات ميدياتيك (بالذات سلسلة 67XX) 

-

فى عوامل تانية بتأثر فى الصورة زي الـOptimization بتاع الكاميرا، و اللي لو الشركات
اللى بتصنع الموبايل عرفت تظبطه هتلاقى الكاميرا بتاعة الموبايل بريمو 

أضف لكدة تطبيق الكاميرا نفسه، و اللى ممكن يديك خيارات تصوير احترافية بالهبل، أو يظبط وضع
 الـAuto علشان يطلع أحسن صور

العامل الأخير هو جنابك شخصيا؛ بمعنى إن ممكن الكاميرا تكون ممتازة لكن السواق حمار و مبيعرفش يصور ،
و على العكس، لو انت مصور كويس و معاك كاميرا تعبانة هتطلع صور نضيفة برضو 

تخيل إننا خلصنا؟

 يلا بقى سجدة شكر للمولى عز و جل و ننزل بأغنية و الله و عملوها الرجالة 

متنساش بقى تشترك فى النشرة البريدية اخر الموضوع ده علشان تتابع كل جديد