الفرق بين ال Digital و ال Analog

الفرق بين ال Digital و ال Analog

    الفرق بين ال Digital و ال Analog



    بسم الله الرحمن الرحيم

    هتكلم معاك النهاردة عن موضوع فى غاية الخطورة و الأهمية و هو الفرق بين ال Digital و ال Analog
    من فترة ليست بقريبة و ليست ببعيدة (حاجة وسط كدة يعنى ) اتكلمنا عن إن إزاى الصوت (اللى هو تناظري)
     بيتحفظ فى ملفات على ذاكرة الجهاز اللى بتستخدمه (يعنى المفروض يبقى بيانات رقمية)،
     و بعدين يرجع تانى يتحول تناظري علشان تسمعه من السماعات بتاعتك
    كلامنا النهاردة بقى فى الفرق بين الـAnalogue و الـDigital

    تعرف على ما هو الفرق بين ال Digital و ال Analog



     عاوز أقولك إن الموضوع دا مهم جدا، و بيتوقف عليه عوامل و أبعاد كتيرة، و بيفتح آفاق جديدة
    فى عالم التميز الغير مشروط بأي من الأشياء التى تحول دون الـ...انزل على السطر اللى بعد دا هلى
     طول بلاش غباوة 
    طبعا فى احتمال 90% إنك تكون مش عارف أصلا يعنى إيه Analogue
     و يعنى إيه Digital، و باقى الـ10% هو إنك دخلت على Google Translate
     و لقيت إن Analogue دى معناها "تناظري" و Digital معناها "رقمي"، و فى احتمال كمان 90%
    إنك مش عارف برضو إحنا بنتكلم عن إيه 

     بص يا سيدى.. انت لما بتنقل أي بيانات (حرفيا أي بيانات) بين جهاز و التانى،
     أو حتى بين أجزاء الجهاز الواحد، بيبقى عن طريق نقل الإشارات بينهم
    الإشارات دى ليها نوعين.. رقمي و تناظري
    ------

    أولا: Analogue:

    - هذه الكلمة الفرنجية من بلاد الغرب الكافر معناها "تناظري" (أيوة ما انا عرفت من جوجل ترانسليت )
    - اللى جوجل ترانسليت مقالش لجنابك عليه هو يعنى إيه تناظري (لأ قالى.. يعنى Analogue )

     - أستسمح حضرتك بس لو تقوم تخطف رجلك و تبص بصة على الساعة أم عقارب اللى عندك..
    عارف و الله إنك لسة واكل و مفَشوِل.. بس كل دا فى خدمة العلم 
    الساعة عندك كام بقى؟ (إخلص.. قول الساعة كام )
    طيب عرفت الساعة منين ؟ ( من العلاقة بين عقرب الساعات و عقرب الدقايق و بين الترقيم اللى على الساعة)
    - ساعة الحيطة اللى عندك دى اسمها ساعة تناظرية، و دى هنستخدمها فى شرح أي حاجة Analogue
    --

    نخش بقى فى خواص الإشارات التناظرية:

    - أي حاجة تناظرية بتعتمد على الـ"تناظر" أو الاختلاف بين حاجتين، أو إنك تقيس حاجة بالنسبة لحاجة تانية
    (على سبيل المثال: انت قلتلى إن الساعة مثلا 08:07 كنتيجة لموقع عقرب الدقايق بين رقمين،
     اللى هما 11 و 2 "خمس دقايق و 10 دقايق"، كمان عقرب الساعات كان على 8)
    - الإشارات الـAnalog بتبقى متغيرة باستمرار
    (على سبيل المثال انت ممكن تطلعلى على الساعة الـAnaloguee اللى عندك أي وقت أطلبه منك بالثانية،
    أو حتى بأجزاء من الثانية لأن العقارب بتلف فيها باستمرار و مبتقفش)
    - الإشارات الـAnalog بتتعرض للتشويش بسهولة
     (كان عندى ساعة بعقارب قبل كدة لما تحط عليها مغناطيس بتقف، و لو المغناطيس قوي شوية ممكن تلف بالعكس  )
     غير الساعات اللى بعقارب، الإشارات التناظرية دى موجودة فى حاجات كتير جدا من
     التكنولوجيا اللى حوالينا؛ على سبيل المثال:
    - التليفزيون الأرضي (القناة الأولى و التانية) بيشتغلوا بإشارات تناظرية
    - الراديو (خصوصا موجات الـAM بتشتغل بإشارات Analog)
    - التليفون الأرضي (أبو سلك دا) بيشتغل برضو بإشارات Analog
    - أما بقى معظم السماعات اللى بتستخدمها فبرضو بتشتغل بإشارات Analog 
    - الشاشات اللى بتشتغل بـVGA Ports بقى بتشتغل Analog

    نيجى بقى لموضوع الـDigital:

    - زي ما الحاج Google Translate قالك.. إن Digital معناها رقمي،
     بس رقمي إزاي حضرتك؟ 
    أنا هقولك
    - لو معاك ساعة رقمية (أو حتى ساعة الموبايل اللى بتبقى فى الـStatusbar) بص فيها
     و قولى الساعة كام 
    عرفت الساعة منين بقى ؟ ( هو كاتبهالى!  )
    الله عليييييييييييييييك  أنا كل يوم بيزيد انبهارى و إعجابى بيك 
    --
    بقولك إيه.. متيجى نتكلم فى خواص الإشارات الديجيتال دى 
    - الإشارات دى بتتكون من تتابعات معينة من الشحنات الكهربية بتتمثل بـ0 و 11، و مفيش حاجة
     غيرهم ولا فى حاجة بينهم
    (على سبيل المثال: انت قلتلى إن الساعة 8:10 علشان قدامك
     على الشاشة 08:100، و الرقم الموجود دا مش هيتغير إلا كمان دقيقة كاملة؛ و بالتالى انت متعرفش
     تقولى مثلا الساعة تمانية و عشرة و كام ثانية؛ لأن الساعة الرقمية إما 08:10 أو 08:11 و مفيش حل وسط)
    - الموجات الديجيتال قابليتها لتشويش أقل بكتير من الأنالوج (لأن المستقبِل بيشوفها إما صفر أو واحد)
     (على سبيل المثال برضو: لو جبت مغناطيس و حطيته على الساعة الرقمية الرقم عمره ما هيتغير،
    و إلا تبقى ساعتك شاربة حشيش )
    --

    الإشارات الديجيتال دى بقى موجودة فى إيه؟

    - الإنترنت اللى بتستخدمه بيكون عبارة عن إشارات رقمية
    - الشاشات اللى بتشتغل بوصلة HDMII بتوصلها إشارات رقمية، و هى اللى بتتسبب فى الصورة اللى انت بتشوفها
    - الموبايل بيبعت لأبراج الشبكة و يستقبل منها إشارات رقمية برضو 
     - القنوات الفضائية اللى بتجيلك عن طريق الدِش (الستالايت) برضو بتبقى رقمية غالبا، لذلك
     هتلاقى مكتوب على الريسيفر بتاعك DVB (أو Digital Video Broadcast)

    يا ترى بقى إيه مميزات و عيوب النوعين دول؟ و إمتا بيستخدوا الإشارات الديجيتال و إمتا الـAnalog؟

    مميزات الـAnalog و بيستخدم إمتا:

     - كونه متغير باستمرار فدا بيخليه مفيد فى الحاجات اللى بتحتاج إنك تعرفها كل شوية
     (زي مثلا سنسورات الموبايل، زي الـAccelerometer و الـGyroscope
     اللى بتديك فكرة عن حالة و وضع الموبايل باستمرار)
     - كمان كونها متغيرة باستمرار بيخليها ممتازة فى حاجة زي تسجيل الصوت (أوقات كتير التسجيل
    التناظري بيبقى صوته أحسن من الرقمي بمراحل، و بيقى فيه تفاصيل كتير جدا برضو  )
    - الحاجات اللى مطلوب منها تستقبل الموجات الـAnalogg غالبا بتكون بسيطة جدا
    و تصنيعها سهل و مش مكلف
    (على سبيل المثال: لو انت عندك سماعة أو Subwooferr
     جرب توصلها فى الكهربا و تفصل الجاك من الكمبيوتر و سيبه فى مكان مفتوح شوية و
    ارفع مستوى الصوت على الآخر.. سامع الست اللى بتتكلم جوا دى؟ دى إشارات راديو AM) 
     - كونها بسيطة فى عملها و بتنقل الإشارات الأصلية من غير تشفير أو ضغط بيخليها تستخدم فى خطوط
    التليفون الأرضي لغاية دلوقتى، بالإضافة طبعا لإن الأجهزة سهلة فى صيانتها و المهندسين
     حضروا فيها دكتوراهاااااات  
    -
    عيوب الإشارات التناظرية:

    - بتأثر بالمسافات؛ و دا طبعا بيضعف الإشارة و بيخليهم يحتاجوا دايما إنهم يعملوا Amplifierss
    (أو مكبرات) على مسافات معينة علشان تضخم الإشارة و تقويها (عارف محطات تقوية الإرسال
     الأرضي و محطات التقوية الموجودة فى السنترالات؟) 
     - سهل جدا إنها تكتسب تشويش؛ و مع تضخيم الموجات الأصلية هتضخم معاها التشويش،
     و بالتالى أحيانا لو بتكلم واحد صاحبك هتلاقى فى التليفون صوت تشششششششششش كأنه بيستحمى
    ناهيك طبعا عن التشويش اللي بيحصل على موجات التليفزيون الأرضي و الراديو  
     - أنا قلتلك فى الأول إن الإشارات التناظرية بتعتمد على الاختلاف بين حاجتين؛ الحاجتين اللى بيكون
     الاختلاف بينهم فى معظم الأحوال هى الموجات نفسها؛ يعنى مثلا موجات الراديو لو فيها موجة كبيرة
     بعد موجة صغيرة فدا معناه إن الموجة الكبيرة دى بتطلع صوت أعلى مثلا، و هكذا
    الـNoise اللى بيبقى فى الإشارات دى بقى بيلخبط أجهزة الاستقبال.. بيلخبطها إيه؟ دا بيهبلها ،
     و بيخليها تطلع صوت "وَشّ" ابن جرمة كفيل بإنه يبوظ المحتوى اللى منقول أو يبوظ ودانك 
    -----

    بالنسبة للإشارات الرقمية فبيبقى الموضوع مختلف شوية:

     - الإشارات دى بتتكون من تتابعات من موجات بترمز لتوصيل التيار و تتابعات لتاية بترمز لفصله.. بس؛
    و مفيش أي حل وسط بينهم ولا فرصة لدخول الضوضاء أو الكلام الفاضى دا، و دا اللى بيخليهم يعتمدوا
    على حاجة زي دى فى تطبيقات كتير، (زي معظم الأجهزة الإلكترونية الحديثة اللى بنستخدمها، كمثال
    عندك الماوس و الكيبورد، عندك هيبقى إما فى ضغطة هتتحسب أو مفيش، لكن مفيش
     نص كليك مثلا و بالباقى Keystrokes  ) 
     - الإشارات دى بتكون عبارة عن موجات كهربية أو كهرومغناطيسية، لكن بدل ما البيانات اللى بتنقلها
    محطوطة على الموجة و ممكن أي حد معاه سماعة و متوصل فيها حتة حديدة يسمعها بتبقى متشفرة
    بحيث إن الجهاز اللى بيبعتها بيشفرها و الجهاز اللى بيستقبلها بيفك الشفرة دى؛ لذلك بتستخدم فى
    حاجة زي الموبايلات و الإنترنت

    هحكيلك قصة ظريفة جدا

     زمان.. فى السبعينات مثلا كان ممنوع إنك تشيل راديو على طيارة.. ممنوع ممنوع يعنى و فيها
    عقوبة و حاجات كتير كدة.. الموضوع دا لأن الإشارات اللى كانت بتتواصل بيها الطيارات مع أبراج
    المراقبة كانت موجات تناظرية فكان سهل جدا إنك تلقط الإشارات دى بأي راديو و تعرف الطيار
     مراته طابخة إيه 
     يا ريت على كدة و بس، دا انت كان ممكن تشوش على الإشارات دى بأي أجهزة إلكترونية معاك
     (زي الموبايل مثلا؟ أو حتى الراديو اللى معاك) لذلك بدئوا يستخدموا موجات رقمية علشان تمنع المشاكل دى
     - الموجات الرقمية ممكن تسافر آلاف الميلومترات من غير ما يحصلها تشويش يُذكر،
     حتى لو حصل نقص فى فرق الجهد أو المدى بتاع الموجات
     و دا لسبب بسيط، إن المساقبل ليه مدى بيحسب فيهم الصفر و الواحد، على سبيل المثال: الصفر مثلا بيتحسب
     لو فرق الجهد اللى واصل للمستقبل بين 0 ڨولت و 0.5 ڨولت؛ و الواحد بيتمسب من 5 ڨولت لـ3.5 ڨولت تقريبا
     و بالتالى حتى لو حصل تغير فى قيمة فرق الجهد أو حصل تشويش بسيط على الموجة بتفضل صفر أو واحد
    حاجة زي دى خلتها تستخدم فى نقل بيانات على مسافات بعيدة، زي الأقمار الصناعية و مكالمات الموبايل
    -

    عيوب الإشارات الرقمية:

     - زي ما قلتلك من كام سطر فوق إن الجهاز اللى بيبعت الإشارات بيشفرها و الجهاز اللى بيستقبل
     الإشارة بيفك الشفرة دى.. أثناء العمليتين دول أحيانا بيحصل فقد بيانات أو تفاصيل بالعبيط 
     عمرك مثلا سألت نفسك ليه صوت اللى بيكلمك فى الموبايل بيبقى أوحش من صوته على التليفون الأرضي؟
     علشان كدة  
     كمان الأجهزة اللى بتبعت أو تستقبل أو تعالج الإشارات الرقمية بتكون غالية جدا
    لو قارنتها بالأجهزة اللى بتشتغل Analog، و بتستخدم تكنولوجيا متقدمة شويتين بتخلى مش
     أي حد ممكن يصلحها أو يلعب فيها  
    كمان من العيوب إنها غالبا بتكون أقل دقة من الحاجات الـAnalogg؛ لذلك لو لاحظت مثلا
    هتلاقى محلات كتير من اللى بيبيعوا دهب بيستخدموا موازين بمؤشر، و مبيستخدموش الموازين الرقمية
     كمان معظم الأطباء (إن لم يكن كلهم) بيستخدموا أجهزة قياس الضغط الزئبقية أو اللى بمؤشر، لأن الأجهزة
     الرقمية (بالإضافة لإنها بتاكل البطاريات و بتبوظ بسرعة ) مبتبقاش بدقة الحاجات التناظرية  
    - الحاجات الديجيتال مش متغيرة باستمرار؛ لذلك نادر لو لقيت لها استخدام فى حاجة زي الـSensorss
    و الحاجات دى لأنها مبتبقاش دقيقة (مش لأنها غالية.. خالص)  
    ------
     حاليا معظم الأجهزة اللى بنستخدمها بتبقى خليط بين التناظري و الرقمي علشان تستفيد من مميزات
     الاتنين و تحكم القبضة الأمنية و كدة  

    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    1. شرحك جميل ولاكن عندي ملاحظات بناءة
      1: اكتب بالعربية الفصحة
      2: دعك من المزاح وكن تلقائي في طرح المعلومة
      وبارك الله فيك

      ردحذف
    2. والله إنك حشيش و شرحك 100%.
      و أحلى حاجة إنك يتتكلم بطبيعتك و بدخل حس الفكاهة في الموضوع و ده بالنسبة ليا بصراحة أخد انتباهي و خلاني أخلص قراءة الموضوع للأخر (و ده نادرا لما بيحصل XD).
      استمر يا ريس :).

      ردحذف
      الردود
      1. حبيبى ياباشا تسلملى و الله (k)

        حذف
    3. ي ريت لو تكتب لينا الفروقات بين الاجهزة الرقمية والتماثلية في نقاط محددة مثلا 1 2 3 4 من حيث الحجم والعمل وتسلم يا باشا

      ردحذف

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×