ملفات Thumbnails عامل اساسى فى تخريب موبايلك

ملفات Thumbnails عامل اساسى فى تخريب موبايلك


    ملفات Thumbnails عامل اساسى فى تخريب موبايلك




    ملفات Thumbnails عامل اساسى فى تخريب موبايلك


    بسم الله الرحمن الرحيم

    بداية الموضوع


     فيه مَلَف (File) علي موبايلك –وموبايلي كمان - ملهوش لازمة وبيستهلك حوالي 1 أو 2 جيجا
     من المساحة الداخلية أقل حاجة 
    مش بس كدا دا كل يوم عن التاني حَجمُه بيزيد ويستهلك من الذاكرة مساحة أكتر والموبايل يقعد
    يجيب لك رسالة: "سعة التخزين غير كافية" ويكَدَّرَك ويقرفك في عيشتك! 
    طيب.. نتكلم كلمتين مفيدين علي بعضهم بقي..
    إيه المَلَف ده؟ وإيه لازمتُه؟ وإزاي تتخلص منُه؟!

    - المُتهم:


    المَلَف اللي بنتكلم عنه ده أسمه (.Thumbnails).. (أولها "دوت")، وبيبقي موجود في مُجلد الـ(DCIM)
     اللي بتلاقي جواه الصور والفيديوهات اللي صورتها بموبايلك!
    الملف ده وظيفتُه بتتمثل في إنك كل ما تتصفح الصور أو الفيديوهات بتاعتك من المعرض (gallery)
    بتاع موبايلك أو أي متصفح ملفات زَي Es File explorer بيسرع لك تصفح الصور دي عن طريق
    إنه بيوَريك (مُصغرات) من الصور اللي عندك بدل ما يجيب أيقونة الصور.. بمعني: إن أنتا كُل ما بتيجي
     تقلب في الصور بتاعتك من غير ما تفتحها فـ بتشوف حاجة زَي (صورة مُصغرة) للحاجة اللي جوا الصورة
    دي من قبل ما تفتحها، ملف الـ(.Thumbnails) دا بقي هوا المسئول عن إن الصور تظهِر لَك؛ و بالتالي
     تاخد فكرة عن محتوى الصورة من غير ما تفتحها.

    وصلت كدا؟ 



    حتي أنتا أكيد لاحظت إنك أوقات لمّا بتقلّب بسرعة (بتعمل Scrolll يعني) في صور حجمها كبير شوية،
    بتلاقي الصور بتظهر لك المحتوي بتاعها بعد كام ثانية. لكن وقبل ما تخرج من معرض الصور مثلاً لمّا تيجي
     ترجع تقلّب في الصور دي –اللي خَدت ثواني علشان تعرض لك اللي جواها- من تاني تلاقي الصور ظهرت
    لك اللي جواها من غير ما تبقي مضطر تستني الثواني دي.. 

    ليه التأخير ده؟


    لأن الملف ده فكرته قائمة علي أنه بيعمل ( أو "بيُنشأ" يعني) مُجلد باسم (.Thumbnails) برضو،
    وجوا المَلَف ده ينشأ صورة مصغرة من كل الصور اللي عندك.. كلها كلها يعنى  ..
    فـ لمّا بتتصفح صور حجمها كبير شوية وتلاقي فيه تأخير كام ثانية في عرض (مُصغرات الصور) دي أعرف
     ساعتها إنه دلوقتي المُصغرات دي بتكون لسّه بتتعمل و تجمع و تتظبط، ولمّا بترجع عليها تاني بعد
    ما تكون حملت بتكون أتنشأت لها الصور المصغرة دى؛ فبتشوفها أسرع.
    الصورة من دول حجمها كحد أقصي بيكون من 50 لـ100 أو حتي 500 كيلوبايت.. حاجة متستاهلش يعني،
    بس كون الملف دا هيعرض نسخة مصغرة من العدد دا كله من الصور.. هوا اللي بيخلي حَجم المُجلد كبير أوي..
    يعني مثلاً واحد زيي عندي ما يزيد بمراحل عن الـ10 آلاف صورة علي موبايلي الحزين.. مستهلكين
     لوحدهم حوالي 4 جيجا، تخيل كدة لو تَم إنشاء ملف بحجم 50 كيلو لكل صورة من دول هيبقي الحجم النهائي أد إيه؟‍! 

    طب إيه حَل موضوع المساحة اللى بتضيع ده؟!


    ممكن بحل بسيط خالص! أمسح المَلَف!  زي ما المثل –وإن كنت بتعارض معاه- بيقول:
    "الباب اللي يجيلك منه الريح، سِدُه وأستريح!"
     بس أنتا مسألتنيش مبحبش المثل ده ليه؟! من رأيي شايف إن حَل المشكلة عمره ما بيكون بأنك تحلها حَل مؤقت
    ، وبعد ما الحَل ده ينتهي تلاقي المشكلة الأكبر ظهرت لَك! مش تحل المشكلة بمشكلة تاني يعني!
    وده برضو هوا الحل المؤقت للـ(.Thumbnails)؛ لأنك لو مسحت الملف النظام هينشأه من تاني! 

     عامةً فيه أكتر من حَل وهُمّا كالتالي:

    1- حّذف الملف نفسه:


    ودي عن طريق إنك تدخل ملف الـDCIM ومنه هتمسح أي ملف أو مجلد باسم (.Thumbnails).
    وعلشان تمسح الملَف ده هتبقي محتاج أي متصفح ملفات زَي ES Fileexplorer أو  Root Fileexplorer
     وتدخل علي إعدادات التطبيق اللي هتختارُه من دول وأختار إظهار الملفات المخفية (Show Hidden Files)
    علشان تعرف تحذفُه! أو ممكن –كمِثال- توصل الموبايل بالكمبيوتر وتمسحهم من عليه 
     بس في الحالة دي بعد ما تمسح الملف بكام يوم هتلاقيه تَم إنشاءُه من تاني بعد يوم.. أتني، أو حتي تلانة.. حل مؤقت يعني..

    2- بأستخدام تطبيق:


    ممكن وبكل سهولة تستخدم تطبيق زَي تطبيق (Thumbnails Files Deleter)
     اللي هتلاقي الرابط بتاعه فى اخر الموضوع. 
    بعد ما تحمله وتفتحه هتلاقي فيه زرار أسمه (Delete Thumbnails) دوس عليه..
    بس برضو دي تعتبر حَل مؤقت مش أكتر..

    أمال إيه الحَل الجذري بقي؟!

    3- تنشأ ملف بأسمُه وتضحك عليه:


    ممكن تعمل حركة حلوة وتطبق فيها الحل رقم (1) و (3) في نفس الوقت.. إزاي؟ من أي متصفح
     ملفات –زَي ES Fileexplorer أو Root Fileexplorer- أفتح ملف الـDCIM
    وأمسح ملف الـ (.Thumbnails)وبعدين تعمل إنشاء ملف File جديد.. وتخلي أسمه بدل أسم الملف اللي مسحتُه..
    يعني تسَمي الملف ده باسم " Thumbnails " وتحطُه جوا ملف الـDCIM.. وبكدا يبقي خلاص، والنظام مش هينشأ
    ملف بالأسم ده تاني.. بس الموضوع دا تعمله علي طول بعد ما تمسح الملف الأصلي.. يعني تمسح الملف
    وتعمل الملف التاني ده علي طول من غير ما تفتح المعرض Gallery لأنك لو فتحته بالغلط هيعمل
    ملف Thumbnails. من تاني وتبقي مضطر تمسحه هوا التاني!

    رابط البرنامج


    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    مشاهدة التعليقات

    إرسال تعليق

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×