تعرف على انظمة رصد الأهداف

تعرف على انظمة رصد الأهداف

     انظمة رصد الأهداف


    لو كُنت من الناس المهووسين بكرة القدم و بيسموا نفسهم "محمود كريستيانو" و "فتحي ميسي" و الحاجات دى، أو لو كنت زي حالاتى من الناس اللى مايعرفوش حاجة عن كرة القدم غير إنها مدورة، كدة كدة أكيد تعرف معلومة إن الأهداف بتتحسب لما الكورة تدخل الشبكة (طبعًا دا في حالة إنها مش Offside و محدش لمسها بإيده)، لكن تفتكر لو جزء من الكورة عدى خط المرمى، تتحسب هدف ولا لأ؟

    سهل جدًا تدينى إجابة بالإيجاب أو النفي و انت قاعد مكانك دلوقتى، لكن لو كُنت مكان حَكَم المباراة اللى فى إيده يقرر إذا كانت الكورة ممكن تتحسب هدف أو لأ، أعتقد القرار هيبقى صعب بالنسبة لك جدًا و انت بتجرى و مقطوع نفسك لمدة ساعة و نص فى الماتش! 

    قرار الحكم فى حاجة زي كدة فى معظم الأحيان يعتبر حاجة مصيرية، زي هدف Geoff Hurst لاعب فريق إنجلترا فى نهائي كاس العالم 1966 لما الكورة يادوب عدت خط المرمى بتاع منتخب ألمانيا الغربية و بعدين خرجت برة المرمى...
     واضح إنى طلعت أعرف عن الكورة حاجات كتير غير إنها مدورة! 

    المهم إن الكُوًر اللى بالمنظر دا بتكون خادعة جدًا للحكام؛ لأن الحكم فى أوقات كتير مابيقدرش يشوف الكورة بشكل واضح،
    و قانون كرة القدم بيقول إن لازم الكورة تعدى خط المرمى بالكامل علشان تتحسب هدف صحيح؛ للتغلب على الموضوع دا اخترعوا موضوع إعادة الأهداف و التصوير من كذا زاوية، لكن الحكم بياخد وقت طويل فى الفُرجة
     على إعادة الكورة من كذا زاوية، و دا بياخد وقت طويل، و على الرغم من كدة برضو فى أوقات
     كتير مابيقدرش يوصل للحقيقة!

    من هنا اخترعوا أنظمة احتساب الأهداف الجديدة زي GoalControl و Hawk Eye، و اللى فكرتهم قائمة على إن الاستاد يكون فيه 14 كاميرا (سبعة عند كل مرمى)، كل وظيفتهم إنهم يراقبوا حركة الكورة و موقعها بالنسبة للملعب
     و بالنسبة لخط المرمى طول الـ90 دقيقة بتوع المباراة، و الكاميرات دى بتكون متوصلة بنظام مراقبة على كمبيوتر
     بيقدر يرسم صورة ثلاثية الأبعاد للكورة فى الملعب فى أي جزء من الثانية؛ و بالتالي تعرف تحدد
     إذا كانت الكورة عدت خط المرمى أو لأ!!

    طيب ما أوقات بتبقى منطقة الجزاء فيها 21 لاعب أصلًا؛ إزاي النظام دا بيشتغل فى ظروف زي دى؟!

    أنظمة احتساب الأهداف الحديثة (جدُا) دى ممكن تشتغل لما 3 كاميرات بس يلقطوا مكان الكورة؛ و دا بيكون كافي جدًا لتكوين صورة ثلاثية الأبعاد للكورة و موقعها من الملعب؛ كمان الكاميرات دى بتبقى متوجهة على المرمى بزوايا مختلفة علشان تقدر تلقط الكورة فى أي مكان... غير كدة كمان، الكاميرات دى بتصور الكورة بمعدل إطارات 500 FPS؛
     و دا بيخليها دقيقة جدًا فى اكتشاف الأهداف من النوع دا بدقة توصل لـ4 ملليمتر!!

    بمجرد ما الكاميرات دى بتكتشف إن الكورة عدت خط المرمى بتبعت إشارة للساعة اللى فى إيد الحَكَم إن الكورة دخلت
     فى المرمى، و إن دا هدف صحيح؛ و دا بيخلى الحكم ياخد قراره فورًا إذا كان هيحسب الجول أو لأ،
     و دى أكيد حاجة كويسة يعني! 

    أنظمة مراقبة المرمى دى تم استخدامها فى كاس العالم 2014، و هتُستَخدَم إن شاء الله فى روسيا فى 2018،
     و حاليا بيستخدموها فى كل ماتشات الدوري الانجليزي الممتاز و الدوري الألماني (Bundesliga)، و فى الدوري الفرنسي و الدوري الإيطالي، و قريب جدًا هيستخدم فى الدوري الأسباني... لكن مش دى الطريقة الوحيدة اللى بيتأكدوا
     بيها من صحة الأهداف...

    حاليًا بيتم استخدام تاني اسمه GoalRef بيعتمد على دوائر مغناطيسية بتتحط جوة الكورة و مستشعرات بتقيس
     شدة المجال المغناطيسي بتتحط فى أجزاء من القائم أو تحت النجيلة علشان تقيس التغير اللى بتعمله الدواير
     الكهربية اللى فى الكورة لما بتدخل المرمى، و دى أرخص من أنظمة الكاميرات بكتير، و بتستخدم فى بطولات كتير،
     زي بطولة كاس الأمم الأفريقية 2008 (كانت الكورة اسمها Wawa aba لو تفتكر  )

    لكن عمومًا نظام GoalRef دا ناس كتير بيشككوا فى نزاهته و فى إمكانية الاعتماد عليه؛ لأن الكورة بتكون مختلفة عن الكورة بتاعة التدريبات و الكُوَر العادية اللى بيتلعب بيها دايمًا فاللاعبين ممكن يواجهوا صعوبات أثناء اللعب؛ و علشان كدة عملوا أنظمة الكاميرات دى علشان يستخدموا كورة عادية... علشان مايطلعش فريق يتلكك و يتهم الفريق المنافس ليه إنه بيكسب بالمغناطيسات مثلًا! 

    تفتكر إمتى ممكن نشوف نظام زي GoalControl و Hawk Eye فى الدوري المصري؟ ولا الفِرَق هتتهم بعض برضو إنهم بيكسبوا بالكاميرات؟! 

    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    مشاهدة التعليقات

    إرسال تعليق

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×