اخر اخبار هاتف Huawei الجديد Mate 9

اخر اخبار هاتف Huawei الجديد Mate 9

    اخر اخبار هاتف Huawei الجديد Mate 9



    بسم الله الرحمن الرحيم

    النهاردة كان فى مؤتمر لشركة هواوى الصينية
    (واوى أو واه-واى علشان لو خالك تشانغ شاف البوست نبقى كتبناها بكل اللهجات) 
    ما علينا.. شركة Huawei أعلنت عن موبايلها الرائد الجديد لسنة 2016، أو خلينا نقول 2017
    بما إن السنة بتودع أهى 
    فى الحقيقة كان المفروض أقول موبايلين، أو فلاجشيبين
     (دى مثنى Flagship.. ملهاش علاقة إطلاقا بشبين الكوم)
    المهم.. Huawei أعلنت عن Mate 9 و أخوه النضيف النهاردة 
    خلينا فى الأول نتكلم عن Mate 9

    الموبايل كمواصغات كويس جدا، و مواصفاته كالتالى:

    - شاشة 5.9 إنش بدقة FHD (يعنى 1920*1080، مش فهد ولا حاجة )

    - الموبايل بيجى بإصدار أندرويد 7.0 Nougat، و عليه واجهة EMUI 5.0 اللى اختلفت عن الإصدارات السابقة
     من نفس الواجهة من حيث الشكل و المضمون (اختلفت للأحسن طبعا  )، و بقت خفيفة بشكل أكبر و قريبة
     من الأندرويد الخام فى حاجات كتير، و فيها تحسينات علشان الموبايل ميبقاش أبطأ مع الوقت زي أي
    موبايل تانى، و حطلى 30 خط تحت أي موبايل دى 
    - بطارية 4000 ميللى أمبير ساعة (و متقوليش "ميللى أمبير" بس علشان دى وحدة قياس و دى وحدة قياس تانية )
    مع تقنية شحن سريع بإسم Huawei Supercharge، و اللى هواوى بتقول إنها بديك استخدام
    يوم كامل من البطارية لو شحنت الموبايل لمدة 20 دقيقة بس.. أما نشوف 

    - تشيبست Kirin Hisilicon 960، و اللى بتحتوى على معالجين كل واحد فيهم رباعي النواة
    . * واحد رباعي النواة بتردد 2.4 جيجاهيرتز بمعمارية Cortex A-73 علشان المهام التقيلة (جدا)

    . * و واحد كواد كور بتردد 1.8 جيجاهيرتز، و بمعمارية Cortex A-53 للمهام الخفيفة
    (دا على اعتبار إن "رباعي النواة" غير "كواد كور" )

    . * المهم إن معالج الرسوم، و للمرة الأولى فى تاريخ Huawei يعتبر أقوى معالج رسوم فى السوق،
    و استخدموا فيه المعالج الأحدث من شركة ARM، و اللى يعتبر الموبايل دا أول طَلعَة ليه، Mali-G71 MP8
    (معالج الرسوم دا كان اتسرب كلام إنه هيكون معالج الرسوم فى جلاكسى S8 اللى هينزل السنة الجاية.. لك أن تتخيل يعنى )

    - كاميرتين من شركة Leica (أظن دا كفيل بإنه يديك انطباع مبدئي عن السعر )
    . * واحدة ألوان بدقة 12 ميجابيكسل، و فيها Optical Image Stabilization
    . * و واحدة بدقة 20 ميجابيكسل Monochrome (أبيض و أسود يعنى)
    الاتنين بفتحة عدسة F/2.2 و بيصوروا فيديو 4K
    مع Laser AutoFocus و فلاش ثنائي
    الكاميرتين اللى أنا اتكلمت عليهم دول لامؤاخذة ورا 

    - قدام هتلاقى كاميرا واحدة بدقة 8 ميجابيكسل و فتحة عدسة F1.9
    - الجهاز مفترض إنه بينزل بنسخة واحدة (لغاية وقتنا هذا) بتيجى بمساحة داخلية 64 جيجا و رام 4 جيجا،
     مع شريحتين اتصال و إمكانية استخدام مكان الشريحة التانية علشان تركب Micro SD
    لغاية 2 تيرابايت (دا لو لقيت ميكرو SD 2 تيرا يعنى )
    - الموبايل فيه 4 ميكروفونات بيشتغلوا فى وقت واحد لما بتسجل حاجةة، و ممكن بعد كدة تشيل صوت
     من الأصوات اللى اتلقطت بميكروفون معين علشان تسمع الباقي (شايف الصياعة؟ )
    - لأول مرة فى سلسلة الـMate، الموبايل فيه IR blaster و USB Type-C
    سعر الموبايل اللى بنتكلم عنه دا 700 يورو، و شوف اليورو بكام النهاردة 
    ------

    أما الموبايل التانى (أو الأخ الأنضف للميت 9) فاسمه Huawei Mate 9 Porsche Edition 
    الموبايل (على الرغم إنه منقوش من سامسونج جلاكسى نوت 7 الله يرحمه) ممتاز من حيث التصميم
    و حاجة كدة تشوفها ترَيِّل 
    بس لما تشوف السعر تعيط 
    كل الفرق اللى بين الميت 9 و الأخ دا هو الشاشة
    (اللى هنا 5.5 إنش QHD من نوع AMOLED و منحنية من الطرفين)
    و الرام 6 جيجابايت
    مع سعة داخلية 256 جيجا 
    و السعر... السعر... السعر... مش قادر أقولها 
    1400 يورو 
    يعنى تقريبا 1550 دولار 
    -------

    ماشي.. اسمع رأينا بقى فى الموبايلين دول 
    - أولا: التصميم على الرغم إنه مش جديد، إلا إنه مازال تصميم كويس جدا
    - موضوع واجهة EMUI 5.0 الجديدة القريبة من الخام تعتبر حركة كويسة جدا من هواوى، خصوصا إن ناس
     كتير بعدوا عن أجهزة الشركة بسبب الواجهة اللى فى رأيى مكانتش وحشة، لكن فى نفس الوقت مكانتش حلوة 
    - الكاميرا دى حاسس و الله أعلم إنها هتتفوق على كاميرا الـS7 و البيكسل و آيفون 7، و هيبقى فيها كمية تفاصيل رهيبة
    - حاسس إن الكاميرا دى ممكن تكون كلام على ورق و متتفوقش ولا حاجة
     (دا احتياطي علشان فى حالة إن النقطة اللى فوق متحققتش يعنى )
    - تصميم البورش منقوش بنسبة 71% من نوت 7، دا حتى البصمة من قدام 
    - متسألنيش إيشمعنا 71% علشان دا لزوم الشبحنة 
    - دقة Full HD على شاشة 5.9 إنش أعتقد إنها هتكون قليلة نسبيا فى 2017
    - الأسعار دى فى متناول تجار الآثار 
    - اللى ممكن يشترى الموبايل دا غير تجار الآثار هما تجار المخدرات 
    --------

    مدونة أردرويد
    @مرسلة بواسطة
    كاتب ومحرر اخبار اعمل في موقع مدونة أردرويد .

    ردد معي : ربنا اغفر لى و لوالدى و للمؤمنين يوم يقوم الحساب

    مشاهدة التعليقات

    إرسال تعليق

    تم اكتشاف مانع الأعلانات

    من فضلك قم بتعطيل أداة مانع الأعلانات أدبلوك AdBlock من المتصفح للدخول لمدونة أردرويد أو يمكنك أستخدم متصفح أخر وشكرا لك :)

    مدونة أردرويد تعتمد فقط على الأعلانات كمصدر لدخلها و هى لا تحتوى على اعلانات منبثقة او مزعجة لذلك نرجو منك تفهم الأمر بدون أنزعاج وشكرا لك :)

    ×